AMED - Amîne Kayaye 27ê Teşrîna Peyêne de tewrê grevê vêşanîye ke bi sloganê ‘Abdullah Ocalanî rê azadî, seba problemê kurdî çareserî’ dîya destpêkerdiş, bî. Dadîya Amîneye Meryem Soyluye da zanayîş ke ganî wayîrê çalakîye bêro vejîyayîş û vat: “Şarê Kurd binê şertê giranan de her tim bedêlanê girdan dayo. Tepişteyi xover danê û ganî ma zî teber de xover bidê.” 

 

Rayberê PKKyî Abdullah Ocalano ke 25 serrî yo Îmraliyî de binê tecrîdî de yeno tepiştiş û 33 aşmî yo zî tu xeberêke ci ra nîna girewtiş. Seba azadîya fîzîkî ya Abdullah Ocalanî 27ê Teşrîna Peyêne de zîndanan de bi sloganê "Abdullah Ocalanî rê azadî, problemê kurdî rê çareserî" grevê vêşanîye dîya destpêkerdiş û do heta 15ê Sibate grev dewam bikero. Nê tepişteyê ra yew zî Amîne Kayaya ke Zîndanê Bakirkoyî yê Cinîyan ê Stenbolî de tepişteya ya. 

 

Dadîya Amîneye, Meryem Soyluye derheqê babete de ajansê ma JINNEWSî rê qisey kerd. 

 

‘Prosesê bîyayîş û çinîbîyayîşî’ 

 

Meryeme qiseykerdişê xo de dîyar kerd ke çalakîya ke dîyaya destpêkerdiş tena zîndanan de nê ganî teber de zî bêra kerdiş û wina vat: “Ganî ma zilm rê vajî nê, êdî bes o. Grevê vêşanîye binê şertê giranan de pê yeno. Çalakîya ke seba serekatî dîyaya destpêkerdiş manîdar a. Ganî şarê ma wayîrê îradeyê xo û wayîrê serekatî bivejîyo. Şarê kurdî nê rayîrî de can û malê xo feda kerd. No proses xeylê muhîm o. Ganî her kes destê xo bido serê wijdanê xo. Ganî wayîrê serekatî, azadî, şehîd û herra xo bêro vejîyayîş. No proses seba şarê kurdî prosesê bîyayîş û çinîbîyayîşî yo.” 

 

‘Tarîxê dinya de tecrîdêk winasî nêameyo dîyîş’ 

 

Meryeme ard ziwan ke azadbîyayîşê Rayberê PKKyî Abdullah Ocalanî do Kurdistan azad bikero û wina dewam kerd: “Tarîxê dinya de tecrîdêk winasî nêameyo dîyîş. Şarê kurdî binê şertê xirababin de bedêlê giranan dayo. Dewî ameyî veşênayîş. Malî ameyî talankerdiş. Tepiştiş û îşkence pê ameyî. Her tewir çî ame sereyê şarê kurdî. Vera înan de şarê kurdî têkoşînê xo dewam kerd. Şarê kurdî bi xoverdayîşî cewab da hovîtîyan. Tîya ra pê zî do cewab bido. Dewlete Abdullah Ocalani ra tersena. No tecrîd qet nîno qebûlkerdiş.”

 

‘Şertê zîndanan verê cû ra hîna bîyo xirab’ 

 

Meryeme qiseykerdişê xo de bale ant serê rewşa kênaya xo Amîne û wina dewam kerd: “Amîne zevir ra amelîyat bî. Nika zî çimanê xo ra nêweş a. Randevu gêna la nîna qebulkerdiş. Ez 9 serran zîndan de menda. Şertê zîndanan baş zana. Werd xeylê xirab o. teda yena kerdiş. Nêweşî nînê dermankerdiş. Şertê zîndanan verê cû ra hîna bîyo xirab.”

 

‘Ez kênaya xo û embazanê aye pîroz kena’ 

 

Meryeme qiseykerdişê xo yê peyênan de vat ke kênaya aye û tepişteyê bînî vera şertê giranan û nêweşîyanê xo de reyna zî kewtî grevê vêşanîye û wina peynî kerd: “Kênaya mi û embazê xo seba serekatî kewtî grevê vêşanîye. Ez înan pîroz kena. Kênaya mi waya hîrê şehîdan a. Seba serekatî vera nêweşîyanê xo kewte grevê vêşanîye. Ez venga şarî kena, yê ke xo rê vanê ez kurd a, ma azadîya serekatî wazenê, ganî çi destê ma ra bêro ma bikerê.”