AMED - Aktîvîsta TJAye Nesîbe Uygune derheqê Makbule Ozera 81 serrî ke raporê ‘eşkena tepişte bimana’ semedê aye ameybî dayîş de qisey kerd û venga paştîdayîşî kerd. 

 

Makbule Ozera 81 serrî 9ê Gulana 2022yî de qezaya Artemêtî ya Wanî de bi bahaneyê ‘Hetkarîya rêxistine kerda’ 2 serrî û yew aşme cezaya zîndanî aye rê ameybî birnayîş û ameybî tepiştiş. 7ê Êlula 2022yî de dima ke cezaya aye ame taloqkerdiş ameybî tehlîyekerdiş. ATKyî derheqê Makbule Ozere de raporê eşkena tepişte bimana da. Dimayê qerarî semedê Makbuleye vengdayîş ame kerdiş. Dimayê reaksîyonan bi bahaneyê raporan de nakokî est o Serdozgerîya Komare ya Wanî qerarê ‘do qerar newe ra bêro ercnayîş’ da û dosya şirawit ATKyî. 

 

Aktîvîsta Têgêrayîşê Cinîyanê Azade (TJA) Nesîbe Uygune derheqê qeraro ke semedê Makbule Ozere ame dayîş û nizdîbîyayîşê ATKyî de ercnayîş kerd.

 

‘Semedê dewlete kurdbîyayîş mird nêkeno’ 

 

Nesîbeye ard ziwan ke semedê dewlete nasnameyê cinî û kurdbîyayîşî bes ê ‘sucdarkerdişî’ yo û vat: “Gelo dadîyêk 81 serrî do hetkarîyêk senî bida rêxistine, yan zî endamtîyêk senî bikera? Coka ra zî muhakemekerdişê aye balkêşin o. Her çend ke se ra 61 raporê aye yê astengdar bibo û nêeşka lazimîyanê xo bi xo bikera, qerarê ‘bitepişnê berê bierzê zîndan’ danê. No nêbeno ke bêro qebulkerdiş û komel nêbeno ke normal pêşwazî bikero.”

 

‘Tip de zî êdî qerarê hetgirî yenê dayîş’ 

 

Nesîbeye bala at serê qerarê hetgirî û wina dewam kerd: “Bawerîya komelî bi edaletî nêmendo. Mercîya tewr zêde ke bawerî pê ameyêne û xoser Tip bî. La ma nika ewnîyenê tip zî qerarê hetgir dano. Seba tepişteyo nêweş Şakîr Turanî raporê ‘nêeşkeno tepişte bimano’ ame dayîş. La vera nê qerarî zîndan de dinyaya xo bedelnaye. Zîndanan de bi seyan tepişteyê nêweşî est ê. Vera nêweşîyê giran est ê zî tepişte nînê serbest verdayîş. Eke nê tepişteyî rotoxê tîryakî bibayêne û cinî qetil bikerdêne do biameyêne veradayîş. Ganî ma bêedaletîya sîstemî tîya ra bivînê.” 

 

‘Şarê kurdî bi serran o têkoşîn keno’ 

 

Nesîbeye qiseykerdişê xo yê peyênan de bale ant serê zilm, qirkerdiş û hêrişanê dewlete û da zanayîş ke şarê kurdî bi serran o vera hêrişan de têkoşînê xo rayîr ra beno û wina peynî kerd: “Vera heme bêedaletîyan de ganî her kes vajo êdî bes o. Ganî her kes wirzo payan ser. Ma qeraro ke seba Makbuleye ameyo dayîş qebul nêkenê. Ganî sere de cinî, heme kes wayîrê Makbuleye bivejîyo.”