Şehriban Aslan

 

AMED - Roniştişê dewaya aktivîsta TJAye Rojbîn Sevîl Çetina ke bi kutik îşkence bi aye ameybî kerdiş de dozger şîdetê serê Rojbîne sey "îşkence" nêdî. Avûkata Rojbîne, Ozum Vurgune vat: "Dewlete hem îşkence kena û hem zî derheqê polîsan de tu tehqîqat nêkena." 

 

Amed de 26ê Hezîrana 2020î de polîsan eşt keyeyê aktivîsta Têgêrayîşê Cinîyanê Azade (TJA) Rojbîn Sevîl Çetine û pê kutikan îşkence bi aye kerdbî. Dimayê 11 rojan ameybî tepiştiş. 

 

Roniştişê hîrine yê dewaya vizêr 9ine Mehkemaya Cezaya Eslîye ya Amedî de ame dîyîş. Rojbîne bi Sîstemê Veng û Dîmenî (SEGBÎS) tewrê roniştişî bî. Roniştişê dewaya aktivîsta TJAye Rojbîn Sevîl Çetina ke pê kutikan îşkence bi aye ameybî kerdiş de dozger şîdetê serê Rojbîne sey "îşkence" nêdî. Avûkata Rojbîne, Ozum Vurgune derheqê babete de ercnayîş kerd. 

 

'Bi saetan îşkence Rojbîne ame kerdiş’ 

 

Ozume da zanayîş ke dosya de tena seke kutikî Rojbîne gaz kerdo ame mojnayîş û wina vat: “La na hedîseye serê sîstematîkbîyayîşî ercnenê. Bi saetan îşkence Rojbîne ame akerdiş, aye erdî ser de dayî rakewtiş. Tîya de ma vînenê ke Serdar Gokî, heywanî sey çeke şuxilnayo." 

 

'Cigêrayîş goreyê metodan nîyo’ 

 

Ozume dîyar kerd ke şahido ke îşkence dîyo, nêame goşdarîkerdiş û wina dewam kerd: “Wexto ke ma ewnîyenê qewimîyayîşî ma vînenê ke hêrişêk sîstematîk bi Rojbîne ameyo kerdiş. Wezîfedarê awanîye ke nêame goşdarîkerdiş bîyo şahidê îşkenceyî. O vano, ‘Mi îşkence dî’. Mi nêgirewtî keye. Mi verê berî de îmze eşt’. Ma tîya de vînenê ke cigêrayîş goreyê metodan nêameyo kerdiş.” 

 

'Derheqê polîsan de tehqîqat nêdîya destpêkerdiş' 

 

Ozume ard ziwan ke dewlete hem îşkence kena û hem zî derheqê polîsan de tu tehqîqat nêdana destpêkerdiş û wina peynî kerd: “Qewimîyayîş de mudurê emnîyetî yê bînî rê vano Rojbîne zure kena, vana wezîfedarê awanîye bîyo şahidê qewimîyayîşî. Wina nusenê. Dima ra zî derheqê dosyaye de çîyêk nîno kerdiş.”