Oznur Deger

 

MÊRDÎN - Hemsereka newe ya Rêxistina HEDEPî ya Mêrdînî Necla Acibucaye bale ant serê xerîtaya rayîrî û wina vat:"Eke tecrîdê serê Raybertî wirzo do ancax o wext cinî û komel bieşkê azad bibê. Ma do bi xebatê xo yê baş ê Mêrdînî vera heme polîtîkayê lêşinan de vinderê." 

 

Rêxistina Partîya Têdûşt û Demokrasîyî yê Şaran (HEDEP) ya Mêrdînî kongreya xo ya 3ine ya asayî 3yê Kanûne de pê ard. Babeta yewine ya ke temamê kongreyî de vejîya aver tecrîdê mûtlak ê serê Rayberê PKKyî Abdullah Ocalanî bî. Sewbîna kongre de babaeta grevê vêşanîye yê zîndanan ke dîyaya destpêkerdiş vejîya aver. Sewbîna kongre de kesê ke beşdar bîyî bale antî serê polîtîkayê şerê taybet û qeyûman. Dimayê kongreyî rayîrberîya Rêxistina HEDEPî ya Mêrdînî ame bedilnayîş û sey hemserekî Necla Acibuca û Mehmet Mehdi Tunçî ameyî weçînayîş. 

 

Hemsereka newe ya Rêxistina HEDEPî ya Mêrdînî Necla Acibucaye derheqê xeta xo ya têkoşînî û xerîtaya rayîrî de qisey kerd. 

 

'Ma hêzê xo şar û bawerîya xo ra gênê' 

 

Neclaye da zanayîş ke înan semedê Mêrdînî gamêke newe eştê û wina vat: "Polîtîkayê şer ê taybet tewr zêde Kurdistan de serê tutan û cinîyan de yeno rayîr ra berdiş. Ma do vera nê polîtîkayan de vinderê. Ma do bi vindertişêk, bi hêz û azadîye înan polîtîkayan birijnê û ma do ser bikewê. Ê vanê qey ê do bi qeyûman tayînê serê îradeyê ma bikerê. Çend qeyûman tayîn bikerê zî ma do vera înan de hîna bi hêz bibp. Şarê ma zî na bawerî de yo. Ma hêzê xo şarê xo ra û bawerîya xo ra gênê. Ma do polîtîkayê qeyûman bidê vindarnayîş."

 

'Eke tecrîd wirzo do cinî û komel azad bibê' 

 

Neclaye bale ant serê polîtîkayê tecrîd û şerê taybet û wina vat: "Rojawan ra bîgîrê heta tîya polîtîkayê şerê taybet yeno rayîr ra berdiş. Taybetmendîya xo de serê ciwanan de zaf zêde yeno rayîr ra berdiş. La ganî ma vera înan de vinderê. Ma do vera heme tewirê înan polîtîkayê lêşinan de vinderê. Tecrîd tenê serê Rayberê ma de nê serê cinî û komelî de zî yeno rayîr ra berdiş. Heta tecrîdê serê Raybertî wirzo do tecrîdê serê cinî û komelî zî nêwirzo. Eke tecrîdê serê Raybertî wirzo do cinî û komel azad bibê." 

 

'Ma do têkoşînê xo xurt bikerê' 

 

Neclaye ard ziwan ke ê do destpêk de vera polîtîkayê qeyûmanî de vinderê û wina vat:"Ma do bi taybetî giranîye bidê xebatê cinîyan. Ma do vera xespkerdişê destkewtişê cinîyan de bivejê. Ma do bi xebatê xo yê baş ê Mêrdînî ma do vera heme polîtîkayê lêşinan de vinderê. Ma do têkoşînê xo xurt bikerê. Ma do vera polîtîkayê destdergî, tecawuzî de vinderê. Serê embazanê ma yê cinîyan de polîtîkayê lêşin yenê rayîr ra berdiş. Ma do vera înan polîtîkayan de vinderê û ma do semedê şarî bi taybetî seba cinîyan xebate baş bikerê. Ma hêvî kenê ke na game azadî, têduştî û aştîye bîyara. Ma cuyêka têduşt û azade wazenê."