Dîlan Babat

 

ANQARA - Hemverfeka Komîsyonê Zîndanan ê ÎHDyî Nuray Çevîrmene tecrîdê giran ê serê Rayberê PKKyî Abdullah Ocalanî û rewşa tepişteyê sîyasî yê ke kewtî grevê vêşanîye ercnaye û veng kerd ke ganî bi lezkî peynîya tecrîdî bêro ardiş. Nuraye vat ke seba taqîpkerdişê grevê vêşanîye zî heyet ganî bêro awankerdiş. 

 

Rayberê PKKyî Abdullah Ocalano ko Îmraliyî de binê şertê giran yê tecrîdî de yeno tepiştiş 3 serrî yo keye û avûkatanê xo reyde nêeşkeno pêvînayîş pê bîyaro. Tewr peynî 25ê Adara 2021î de birayê rayberê PKKyî Abdullah Ocalan, Mehmet Ocalan pêvînayîşêk telefonî kerdibî. Sewbîna tepişteyê bîn yê ke Îmraliyî de yenê tepiştiş Hamîlî Yildirim, Veysî Aktaş û Omer Hayrî Konarî ra zî tu xeberêke nîna girewtiş. Zîndanê Tirkîya û Kurdistanî de tepişteyê sîyasî 27ê teşrîna peyêne de bi waştişê ‘Abdullah Ocalanî rê azadî problemê kurdî rê çareserî’ grevê vêşanîye yê dore dayî destpêkerdiş û do heta 15ê Sibate grev dewam bikero. 

 

Bi eynî waştişî 12ê êlula 2012yî de 58 zîndanan de bi tewrbîyayîşê 483 tepişteyan grevê vêşanîye dîyabî destpêkerdiş. Sewbîna 7ê Teşrîna Peyêne ya 2018î de bi serkêşîya hemsereka KCDyî û aktîvîsta TJAye Leyla Guvene grev dîyabî destpêkerdiş. Prosesê grevê vêşanîye de 8 tepişteyî vera tecrîdî de çalakî pê ardî û cuya xo peynî kerdî. 

 

Hemsereka Komîsyonê Zîndanan a Şûbeyê Komeleya Heqanê Merdiman (ÎHD) a Anqaraye Nuray Çevîrmene derheqê grevê vêşanîye û tecrîdî de ercnayîş kerd. 

 

‘Ganî peynîya sîstemê îşkenceyî bêro ardiş’ 

 

Nuraye da zanayîş ke sîstemê tecrîdî yê zîndanê Asayîşo Berz ê Tîpê Fyî yê Îmraliyî bîyo sîstemê îşkenceyî û wina vat: “Her çend ke Tirkîya de normê ke vernîya tecrîdî bigîrê bibê zî tecrîd açarîyayo îşkence. Abdullah Ocalan ne bi keyeyê xo û ne zî avûkatanê xo reyde nêeşkeno pêvînayîş pê bîyaro. Her çend ke Tirkîya de şertê giran de înfaz pê bêrê zî heq est o ke tepişte bi keye û avûkatanê xo reyde pêvînayîş pê bîyaro. La Îmraliyî de sîstemêk taybet ê tecrîdî pê yeno. No sîstem polîtîk o. Tu hetê ci yê huqûqî çin o. Ganî Tirkîya goreyê pêkerdişê mîyanneteweyî têbigêra. Têduştî semedê her kesî ya. Ganî îşkenceyê giran bi lezkî bêro peynîkerdiş." 

 

‘Semedê peynîkerdişê tecrîdî ganî her kes xîret bikero’

 

Nuraye dewamê qiseykerdişê xo de wina vat: “Têkoşînê demokrasîye û têkoşînê peynîkerdişê binpaykerdişan ganî bêrê girdkerdiş. Ganî dezgehî paştî bidê. Ganî partîyê sîyasî plan û bernameyêk bikerê. Ganî binpaykerdişê ke yenê kerdiş bêrê dîyîş. Ganî her kes tecrîdê Îmraliyî bivîno û na babete de vatişî xo bivajo. Seba peynîkerdişê tecrîdî ganî her kes xîret bikero. Grevê vêşanîye ke zîndanan de yeno rayîr ra berdiş yeno zanayîş. Grevêk gird 8ê Teşrîna Peyêne ya 2018î de bi serkêşîya Leyla Guvenen pê ameybî. 26ê Gulana 2019î de zî grev peynî bî. 8 kesan cuya xo peynî kerd. 27ê Teşrîna Peyêne ya 2020î de 120 zîndanan de reyna grev dîya destpêkerdiş. 12ê êlula 2021î de zî ame peynîkerdiş. Ewro tepişte reyna grev de yê. Eke no tecrîd peynî nêbo do grev dewam bikero.” 

 

Nuraye qiseykerdişê xo yê peyênan de vat: “Prosesê grevî de ma bi wezîrîya edaletî reyde pêvînayîş kerd. La polîtîkaya dewlete vera bênetîce mernd. No çareserî nîyo. Ganî keye û avûkat bi lezkî pêvînayîş bikerê. Ganî heyetêk xoser û dezgehî pêvînayîş bikerê. Ma 28ê Teşrîna Peyêne de reyna muracat kerd. Ma nêzanê do senî bi netîce bibo. La semedê wedaritişê tecrîdî ma do waştişê xo reyna bikerê. Pêroyê prosesê grevî de do heyetê ma rewşe taqîp bikero. Netîceyê ci do raporê ma de zî bibê.”