Nazlican Nûjîn Yildiz

 

ÎZMÎR - Sekretera Cinîyan a Şûbeyê Hûmara 2ine ya SESî ya Îzmîrî Sîbel Uyane problemê ke sîstemê weşîye de yenê ciwîyayîş ercnaye û da zanayîş ke polîtîkayêke derheqê weşîya cinî û xizmetî weşîye de nêmendo û problem bi polîtîkayêke raşt eşkeno bêro çareserkerdiş. 

 

Tirkîya de demê peyênan de randewuyê seba nêweşîyan zaf zehmetin bîyo. Problemê sîstemê weşîde de her ke şino zêde beno. Wezîrîyê Weşîye Fahrettîn Koca bi hûmara dermankerdişo ke yeno kerdiş fortê xo dano. Sekretera Cinîyan a Şûbeyê Hûmara 2ine ya SESî ya Îzmîrî û Hekîma Keyeyî Sîbel Uyane da zanayîş ke bi hûmara dermankerdişî nê ganî bi hûmara kesê ke yenê pawitiş fort bêro dayîş û derheqê nê de zî dayeyêk çin o. Sîbele ard ziwan ke bi polîtîkayêke ke weşîya merdiman esas gêno eşkeno no problem bêro çareserkerdiş.

 

‘Xoresnayîşê xizmetê weşîye zaf zehmet bîyo’ 

 

Sîbele da zanayîş ke pîyasabîyayîşê weşîye reyde merdim hetê xoresnayîşê xizmetê weşîye de probleman ciwîyenê û na rewşe seba cinîyan hîna zehmet a û wina vat: “Tirkîya de xizmetê weşîya pawitişî, polîtîkayêke derheqê weşîya cinîye de nêmendo. Sewîyeya yewine de wezîfeyê ma cinî, tutî, kal û pîr ê. La hûmara nêweşan wina zêde ya, xeylê merkezê weşîye yê keyeyî de xizmet baş nîno dayîş. Yê ke tewr zêde zirar vînenê cinî yê. Xizmetê plankerdişê keyeyî nêgênê. Kelepul çin o. Ma cinîyêke uca de derman kenê û ma şirawenê doktorê welidnayîşî. La randevu nêeşkena bigêra. Yanî derheqê nêweşîya xo de nêeşkena şêra dermankerdişêk doktorê pisporî. Ma ma nê cayan de dermankerdiş nêeşkenê bikerê. Hetê randevuyan de problemê girdî est ê.”

 

‘Seba cinîyan rewşe zehmetin a’ 

 

Sîbele dewamê qiseykerdişê xod e wina vat: “Xoresnayîşê xizmetê weşîye seba cinîyan hîna zehmetin a. hetê ci yê ekonomîye est o. Mesref zêde bîyo. Cinî randevu gêna, seba nê çîyî lazimî bi demêk taybet est o. O wext peyda kena, pere çin o. Pere peyda bikera zî randevu nêvînena. Randevu bigêra zî betal beno. Yanî demêk wina xirab est o. La xeylê cayan de hetê dermankerdiş û tespîtkerdişê kanserê rahîm, memik û kolonî de problem yenê ciwîyayîş. Ganî cinî şêrî seba nê çîyan randevu bigîrê.”

 

'Wezaret malzemeyanê ke bi rêk û pêk nêdanê’ 

 

Sîbele sewbîna bale ant serê nêbîyayîşê malzeman ê babeta plansazîyê keyeyî de û wina vat: “Ganî wezaretê weşîye nê malzemeyan bi rêk û pêk bido la nêdano. Wextê xizmetê weşîye yê pawitilî de wext nîno visnayîş, na rey xizmetî peyser manenê. Merdimî nêeşkenê xo biresnê xizmetê dermankerdişî. Nêeşkenê xo biresnê randevu. Wexto ke şêro derman bibo, nêeşkeno derman bibo. Dermanî zaf vay bîyê. Wexto ke cinî bê rewşe hîna zêde giran bena.”

 

‘Wezaret bi hûmara dermankerdişan pesnê xo dano’ 

 

Sîbele vat, no problem bi polîtîkayêk weşîye yê rastî de eşkeno bêro çareserkerdiş û wina vat: “Ganî peynîya polîtîkayê ke weşîye kenê hacet bîyarê. Wezîrê Weşîye Fahrettîn Koca bi hûmara dermankerdişê ke yenê kerdiş pesnê xo dano. Ganî bi hûmara dermankerdişê nê, bi hûmara kesê ke yenê pawitiş pesin bêro dayîş û derheqê nê de zî dayeyêk çin o. Bi polîtîkayêke weşîya merdimî esas gêna, nê problemî eşkenê bêrê çareserkerdiş.”