Oznur Deger

 

104 zîndanê Kurdistan û Tirkîya de tepişteyê sîyasî 27ê Teşrîna Peyêne de bi waştişê "Seba Abdullah Ocalanî azadî, problemê kurdî rê çareserî" dest bi grevê vêşanîye ya dore kerdbî. Yeno pawitiş ke grev heta 15ê Sibata 2024î dewam bikero. Tepişteyê çalakîye de bi hemkarîya keye û avûkatanê xo vengê xo danê eşnawitiş.

 

‘Ma do serê herra xo de azad bê’ 

 

Nurcan Aslana ke Zîndanê Cinîyan ê Tarsusî yê Mêrsînî de manena, bi pêvînayîşê telefonî yê bi keyeyê xo reyde venga rayaumûmî kerd û vat: “Sebebê destpêkerdişê grevî dîyar o. Na nuqta de ma paştîdayîşê heme rayaumûmîye pawenê. Kesê ke xo rê vanê ez merdim a û azadîye wazena ganî bibê vengê hemleye û vengê zîndanan. Serkewtiş bi no hawa, bi yewîye eşkeno bêra dest fînayîş. Bawerîya ma gird a ke ma xo biresnê amancê xo. Ma tepişteyî do bi şarê xo reyde serê herra xo de azad bibê. Her kesî rê serkewtiş wazena.”

 

‘Vera zilmî de kewtişê grevî’ 

 

Dadîya Nurcane, Muzeyyen Aslane zî derheqê grevê vêşanîye de qisey kerd û venga rayaumûmî kerd ke bibê vengê tepişteyan. Muzeyyene wina dewam kerd: “Tepişteyan ser de tedayêke gird est a. Her reya ke ez şina pêvînayîş binpaykerdişê heqan û probleman vînena. Nika vera zilmî de kewtî grev. Semedo ke tepişteyê nêweşî bêrê dermankerdiş, semedo ke tecrîdê Îmraliyî peynî bibo, grev dayî destpêkerdiş. Sere de keye û heme kes vera nê zilmî de bêveng memanê.” 

 

‘Wa cenazeyî zîndanan ra nêvejê’ 

 

Muzeyyene qiseykerdişê xo yê peyênan de veng kerd ke ê nêwazenê zîndanan ra cenaze bivejê û wina peynî kerd: “Ganî ma destur nêdî nê çîyî. Ganî tecrîd bi lezkî wirzo. Ganî tepişteyê nêweşî bi lezkî serbest bêrê veredayîş. Tepişteyê nêweş yê ke nêeşkenê tena sereyê xo bi ciwîyî est ê. Cayêko winasî ke tede hende zilm est o de tepişte kewtî grevê vêşanîye. La rayaumûmî bêveng a. ganî seba tepişteyan paştîdayîş bêro dayîş. Wa êdî cenaze zîndanan ra nêvejp. Ganî tepişteyê nêweşî serbest bêrê veredayîş. La dermankerdişê înan yeno astengkerdiş. Ganî tecrîd li lezkî wedarîyo û tepişteyî bêrê dermankerdiş. Ganî her kes bibo yew. Serkewtiş wina pê yeno.” 

 

Derheqê Nurcan Aslane de 

 

Nurcan Aslane serra 2000î de Îzmîr de ameya dinya. Eslê xo Qoserî ra ya. Serra 2013yî de keyeyê aye reyde agêrenê Qoser. Serra 2016î de wextê qedexeyê tebervejîyayîşî de 26ê Gulana 2016î de 17 tenê ci tutî bi 70 kesî reyde wexto ke hema 16 serrî bî ameye tepiştiş û erşawîya Zîndanê Tîpê Eyî yê Mêrdînî. Nezaret de îşkenceyê giran bi aye kerdî û 4ine Mehkemaya Cezaya Girane ya Mêrdînî cezaya muebetî ci rê birna. Dima ra qerar hetê Dadgerîye ra ame xerepnayîş û newe ra ameye muhakemekerdiş. Na rey 16 serr û 8 aşmî ceza dîyaye ci rê. Bi dore zîndanê Mêrdîn, Hatay û Tarsusî de mende. Yeno pawitiş ke Nurcane serra 2025î de tehlîye biba.