STENBOL - Keyeyê kesê ke merdimê înan têkoşînê azadî û demokrasîye de dinyaya xo bedilnayî, polîtîkayê îşkenceyê vera cenazeyan ê îqtîdarî ercnayî û vatî: “Hêrişê dewlete yê vera cenazeyan bêexlaqî yo. Ma nê çîyî qebul nêkenê. Dewlete dadîyê laçik sipî ra tersena. Ma heqanê xo, azadîya serekatî û heme tepişteyan wazenê. Vera heme hêrişan de ma do têkoşînê tutanê xo dewam bikerê. Ma do serê şopê înan de bê.” 

 

AKP-MHP 20 serrî yo polîtîkayê dişmenîya kurdan bê maben rayîr ra beno. Nê pratîkan ra yew îşkenceyê vera cenazeyan o. Cenazeyê HPGijan kişta rayîran de ameyî definkerdiş, goristanê bêkes û Kîlyosî de ameyî definkerdiş. Sewbîna cenaze bi aşman danê vindarnayîş û nêdîyenê keyeyan. Vera mezelan de hêrişî pê yenê. Cenaze qutîyan de teslîmê keyeyan yenê kerdiş. Keyeyê kesê ke merdimanê xo têkoşînê azadî û demokrasîye de vînî kerdî, dîyar kenê ke vera polîtîkayê dewlete de qet fek têkoşînê xo ra nêverdenê.

 

Keyeyî derheqê polîtîkayê dişmenîye yê îqtîdarî de JINNEWSî rê qisey kerdî. 

 

‘Hêrişê dewlete bêexlaqî yo’ 

 

Kamîle Îmreye da zanayîş ke dewlete polîtîkayê hêriş û pelçiqnayîşî hem Kurdistan û hem zî Rojawanî de dewam kena û wina vat: “Ganî dewlete bi lezkî peynîya nê hêrişan bîyara. Ma do her tim vera polîtîkayê şerî de bê. Ma şer nê, aştîye wazenê. Hêrişê gorê tutanê ma kenê. Esteyê tutanê ma qutîyan de şirawenê. Ma nê bêexlaqî qebul nêkenê. Hêrişê dewlete bêexlaqî yê. Ganî bi lezkî peynîya nê şîdetî bîyara.”

 

Têkoşînî de qerardar ê: Ma azadîya serekatîyê xo wazenê 

 

Nezahat Tîmurtaşe zî wina ercnayîş kerd: “Dewlete tutanê ma qetil kena û cenazeyan nêdana. Ma heqanê xo wazenê. Ma azadîya serekatîyê xo û heme tepişteyan wazenê. Ma azadîya Abdullah Ocalanî de bi israr ê. Heqê tu kesî çin o ke heqaretê ma bikero. Ma heqanê xo wazenê. Ma do heta peynîye têkoşîn bikerê. Ma nê bêhuqûqîye qebul nêkenê.”

 

‘Dewlete dadîyan ra tersena’ 

 

Nezahate qiseykerdişê xo wina dewam kerd: “Ma aştî, demokrasî û çareserîye wazenê. Tutê ma yenê kiştiş. Gorê înan yenê texrîbkerdiş. Esteyê înan nêdîyenê ma. Sebebê nê caardişan zî no yo; ma ra esteyê tutanê ma ra tersenê. Dewlete dadîyê laçik sipîye ra tersena. La dewlete nêeşkena bi ma. Tu polîtîkayêk nêeşkeno ma bipelçiqno. Ma têkoşînê xo dewam kenê.”

 

‘Hemverê merdeyan de zî bêrêzî kenê’ 

 

Kamîle Koç zî wina vat: “Ganî şarê kurdî têhet de bê, bibê yew. Ganî hemverê polîtîkayê dewlete de vengê xo berz bikerê. Ma nê zulmî qebûl nêkenê. Tutanê ma qetil kenê, cenazeyan nêdanê ma. Tutê ma rayîrê rastî de yê. Tutê ma zulmî ver şîyî ko. Hemverê bêtêduştî têkoşîn danê. Dewlete tutanê ma qetil kena û cenazeyan nêdana ma. Dewlete hemverê merdeyan de zî bêrêzî kena.” 

 

Hemverê hêrişan dest têkoşînî ra vera nêdanê Şukran Tukay zî dîyar kerd ke do têkoşînê tutanê xo dewam bikerê û wina qedêna: “Hemverê hêrişê hemverê goran de ma do fek têkoşînê xo ra vera nêdê. Têkoşînê tutanê ma têkoşînê ma yo. Ma rayîrê înan de yê. Ma hemverê şerê lêşin de bêveng nêmanenê. Çi bikewo serê milê ma ma do bikerê û têkoşînê xo her wext dewam bikerê.”