AMED - Platformê şûbeyê KESKî yê Amedî derheqê butçeya ke seba şarî ameya awankerdiş û hetê îqtîdarî ra ameya birnayîş û nufusêk feqîr ke ameyo awankerdiş bi sloganê ‘sermaye rê nê şarî rê butçe’ do mîtîng pê bîyaro.Seba mîtîngî venga tewrbîyayîşî ame kerdiş.

 

Konfederasyonê Sendîkaya Kedkaranê Rayapêroyî (KESK) vera butçeya ke şarî rê nê şer û sermaye rê yena cîyakerdiş de do 2yê Kanûne de Amed û Stenbol de bi sloganê ‘ma buçeyêk hetê kede, butçeyêk hetê demokrasîye’ mîtîng pê bîyaro. Mîtîngê Amedî do Raşteyê Îstasyonî de pê bêro û venga tewrbîyayîşê mîtîngî ame kerdiş.

 

‘Ganî şar wayîrê heqanê xo bivejîyo’ 

 

Hemsereka pêroyî ya KESKî Şukran Kaplane seba butçeya 2024î ercnayîşê ‘butçeya qesrî, sermaye, faîz û rantî ya’ kerd û wina vat: “Butçe keda mîlyonan xesp kena. Vera nê de ma do 2yê Kanûne de raşteyan de bê. Ma do bi waştişê butçeyêk demokratîk û hetê şarî de 2yê Kanûne de Raşteyê Îstasyonî yê Amedî de, raşteyê Kartal ê Stenbolî de bê. Ma venga heme şarê Amedî kenê ke seba wayîrvejîyayîşê heqê xo saet 13.00î de Raşteyê Îstasyonî de bibê.”

 

‘AKP nêeşkeno ekonomîye rayîr ra bero’ 

 

Hemsereka Egîtîm Senî ya Hûmara Yewine ya Amedî Salîha Zorluye zî ard ziwan ke feqîrî her ke şina giran bena û wina dewam kerd: “Polîtîkayê neo-lîberal kapîtalîstî krîz de yo. Hukûmatê AKPyî nêeşkeno ekonomîye rayîr ra bero. Welat krîzêk gird ê ekonomîye de yo û kedkar û feqîr roj bi roje hîna zêde feqîr benê. Bi amancê seba cinî, kede û şarî butçeyêk ma do 2yê Kanûne de mîtîng pê bîyarê. Ma wazenê şarê ma aye roje raşte de bo.” 

 

‘Ma bi pereyêk kêm têkoşînê cuye danê’ 

 

Hemsereka Egîtîm Senî ya Hûmara 2ine ya Amedî Duygu Ozbaye zî ard ziwan ke îqtîdar werdo ke mekteban rê ameyo cîyakerdiş ra birneno û cehd keno ke bi no hawa krîzî çareser bikero û wina reaksîyon mojna: “Sînorê feqîrîye 50 hezar TLyî derbaz kerd. Sînorê vêşanîye zî 18 hezar o. Ma bi pereyêk kêm têkoşînê cuye danî. Ma 2yê Kanûne de vera nê caardişan de raşteyan de bî. Ma venga heme şarê xo kenê ke aye roje wa bêrî raşteyê mîtîngî.” 

 

‘Butçeya dişmenî ked a’ 

 

Komîteya Amadekar a Mîtîngî ra Guneş Ozele venga tewrbîyayîşê mîtîngî şarî rê kerd û wina ard ziwan: “Na butçe butçeya şarî nîya. Butçeya dişmenê ked, polîtîkayê şerî ya. Na butçeya qesrî ya. Ma heme şarê xo 2yê Kanûne roja şeme dawetê Raşteyê Îstasyonî kenê.”