Oznur Deger

 

MÊRDÎN - Ayten Gulcu û Dîlber Kaplana ke tutê înan Bagok de dinyaya xo bedilnayî û cenazeya înan 4 aşmî ra tepîya ame girewtiş venga keye û dezgehan kerdî û vatî: “Wa tutê kesî nêmirê. Keyeyê ke 6-7 serrî yo cenazeya xo nêeşkenê bigêrî est ê. wa wayîrê cenazeyan bivejê. Wa gorêk înan bibo. Ma wayîrê tutanê xo bivejê.” 

 

4ê Tebaxe de Koyê Bagokî yê qezaya Nisêbînî ya Mêrdînî de bombardumano ke pê ameybî de endamê YJA-Starî Leyla Gulcu (Dîcle eylem), Şekirnaz Kaplan (Gulbahar Mercan) û Emîne Kaplan (Eylem Munzur) dinyaya xo bedilnabî. Cenazeyê her hîrê endamê YJA-Starî dimayê 143 rojan vizêr teslîmê keyeyê înan ame kerdiş. Cenaze gorê bêkesan ra ameyî vetiş û Amed, Xîzanî ya Bedlîsî û Êlihî de ameyî definkerdiş. 

 

Dadîya Leyla Gulcu (Dîcle Eylem), Ayten Gulcu û dadîya Emîne Kaplane (Eylem Munzur), Dîlber Kaplana ke hewnê xo ra musayî ke tutê înan dinyaya xo bedilnayî, derheqê prosesî de qisey kerdî. 

 

Dadîya aye hewnê xo de dîya 

 

Ayten Gulcu da zanayîş ke verê ke pê bihesa kênaya aye dinyaya xo bedilnaya hewnê xo de dîya û wina vat: “Mi hewnê xo de hîrê cenazeyê cinîyan têkişt de bî. Çend rojî dimayê qewimîyayîşî 16ê tebaxe de venga mi kerdî. Ma 17ê tebaxe de Amed ra şîyî Mêrdîn. Ma waştişname da dozgerî. Vatî ke şima eşkenê cenazeyan bigîrê. La telefon de vatî ke şaşîyêk virazîyayo ganî şima testê DNAye bidê. Me test da û ma agêrayî Amed.” 

 

DNA dimayê hewteyan şirawitî ATKyî 

 

Aytene dîyar kerd ke bado ke netîceyê DNAye nêame reya diyîne şîyî Mêrdîn û wina dewam kerd: “Her çend ke rêçe engişte bivejîyo zî cenaze nêdayî ma. Ma meşgul kerdî. Vatî hîrê hewte ra tepîya bêrê. Hîrê hewte ra tepîya ma reyna şîyî Mêrdîn. Dozgerî vat DNA erê şîyo ATKyî û coka ra hema netîce nêvejîyayo. Vatî şêrê kam wext ma venga şima kerd bêrê. Ma reyna hîrê hewte vindertî. Ma qerar da ke ma verê edlîye de dest bi çalakîye bikerê. Ma xora her tim bi ATKyî reyde mîyanê têkilî de bî. Ma her roje gêrayîne. Ma reyna şîyî Mêrdîn û ma vat ke dosya lezkî bikerê. Dozger waştişname nuşt û vera dosyayê ma amade bî, bi aşman cenaze nêdayî.”

 

‘Ma muracatê her ca kerd’ 

 

Aytene qiseykerdişê xo wina qedênaye: “Amacê înan dejantiş bî. Ma 4 reyan şîyî Mêrdîn. Ma gor zîrayet kerd. Ma înan gêrayîne. Tewr peynî 22yê Teşrîna Peyêne de ma uca de bî. Ma şîyî cenaze girewt. Ma fek têkoşînê xo ra vera nêda. Ma muracatê ÎHDyî kerd. Wa kes bêveng nêmano. Ma deyndarê tutanê xo yê. Ganî ma tutanê xo bêwayîr nêverdê. Wa tutan bidê. Keyeyê ke 6-7 serrî yo cenazeyê xo girewtî est ê. Wa wayîrê înan bivejê.”

 

‘Kênaya mi bêkes nîya’ 

 

Dadîya Emîne Kaplane, Dîlber Kaplane zî ard ziwan ke verê mergê kênaya xo, aye hewnê xo de dîya û vat: “4 aşmî bî ke seba cenazeye ma têkoşîn kerd. Ma bi desan reyan Êlih ra şîyî Mêrdîn. Nêwaştî esteyê înan zî bidî ma. Dej bi ma dayêne antiş. Ma bi tutanê xo sere berz ê. Rayîrê înan rayîrê şeref o. Ez bi kênaya xo sereberz a. Kênaya mi bêwayîr nîya. Kênaya mi gorê bêkesan de bî. Heta peynîya cuya xo ez do têkoşînê xo dewam bikera.”

 

‘Merdiman bi çekê kîmyewî kişenê’ 

 

Dîlbere dîyar kerd ke dadîya Leyla, Aytene reyde şîyî gorê bêkesan û xîret kerdêne gorê tutanê xo bivînê û wina vat: “Ma gor mabenê xo de pare kerdbî. Ez şîyêne serê gorî û qisey kerdêne. Tay dadî estê ke bi seran o cenazeyê xo nêeşkenê bigîrê. Ez heta weş biba ez do şopdarê rayîrê înan biba. Ez kênaya xo ra sereberz a. Tutanê ma pê çekê kîmyewî kişenê.”