STENBOL - Avûkatanê Buroyê Huqûqî yê Asrînî seba pêvînayîşê bi miwekîlê xo Rayberê PKKyî Abdullah Ocalanî ke 33 aşmî yo tu xebere nîna girewtiş, muracatê Serdozgerîya Komare ya Bursayî û Midûrîyê Zîndanê Îmraliyî kerd. 

 

Avûkatanê Buroyê Huqûqî yê Seserre ra Îbrahîm Bîlmez, Raziya Ozturk, Emran Emekçî û Cengîz Yureklî seba pêvînayîşê bi Rayberê PKKyî Abdullah Ocalan ke Zîndanê Padayeyê Tîpê Fyî bi Asayîşê Berzî yê Îmraliyî de yeno tepiştiş, Serdozgeriya Komare ya Bursayî û Midûrîyê Zîndanê Îmralî muracat kerd. 

 

Heto bîn ra avûkatan, seba pêvînayîşê bi Omer Hayrî Konar, Hamîlî Yildirim û Veysî Aktaş zî hem muracatê dozgerî û hem zî midûrîyê zîndanî kerdî. 

 

Pêvînayîş nîno kerdiş

 

Avûkatanê Abdullah Ocalanî tewr peyîn 2011 de bi miwekîlê xo reyde pêvînayîî kerdibî. Mîyanê 8 serran de Abdullah Ocalanî bi tu hawayî nêeşka bi avûkatanê xo reyde pêvînayîş bikero. Semedê pêvînayîşê bi Abdullah Ocalanî reyde serra 2018ine de bi serkêşîya Hemsereka Pêroyî ya Kongreya Komelê Demokratîk (KCD) Leyla Guven çalakîya grevê vêşanîye amebî destpêkerdiş, çalakî zîndanan de vila bîbî û netîceyê çalakî de avûkatan 5 pêvînayîşê cîya bi miwekîlê xo reyde kerdibî. Pêvînayîşê tewr peyîn zî 7ê tebaxa 2019ine de amebi kerdiş. Dimayê nê pêvînayîşî zî semedê astengkerdişê pêvînayîşan qerarê qedexeyî ame dayîş û pêvînayîş nînê kerdiş. 

 

Sebebê qedexeyan

 

Wextê ewilî de semedê astengkerdişê pêvînayîşê bi avûkatan reyde her tim sebebê sey “Keştî xirab bîya”, “Muxalefetê hewa” û ûsn. ameyîne mojnayîş. Labelê wextê peyîn de pêvînayîş bi sebebê “cezayê disiplînî” yenê astengkerdiş. Serra 2016ine ra heta nika pêvînayîşê avûkatan ê bi miwekîlê xo Abdullah Ocalan reyde 12 rey bi sebebê “cezayê disiplînî” ameyê astengkerdiş. 

 

Qerarê neweyî

 

Qerarê qedexeyê pêvînayîşê bi avûkatan ê tewr peyîn, 31ê teşrîna verêne 2023ine de ame dayîş. Semedo ke demê qerarê qedexeyê 26ê Nîsane de peynî bîne, avûkatê Bûroyê Hiqûqî tê Seserre 6ê teşrîna peyêne 2023ine de semedê pêvînayîşî muracatê Dadgerîya Înfazî ya Bursayî kerd. Dimayê muracatê avûkatan, vejîya werte ke 31ê teşrîna verêne 2023 de reyke bîn semedê 6 aşman qerarê qedexeyê pêvînayîşê bi avûkatan reyde ameyo dayîş. 

 

Avûkatan muracatê AYMyî kerd 

 

Avûkatan muhtewayê qerarê qedexeyî û nimûneyê dosyaye waştî la dadgerî bi sebebê “asayîşî” no waştiş red kerd. Avûkatî do semedê qerarê newe muracatê Dadgeha Destûrê Bingehîn (AYM) bikerê.