Pelşîn Çetînkaya

 

ÊLIH - Endama PMyî ya DBPyî Nurten Uzumcuye da zanayîş ke Êlih ke serranê 90an de koçberîyêk gird girewto de cinî hedefê polîtîkayê şerê taybetî de yê û vat ke vera hêrişan de yewine rayîr têkoşînê cinîyan ê rêxistinkerde yo û ganî no têkoşîn bêro girdkerdiş. 

 

Kurdistan de polîtîkayê şerê taybet ke çinîkerdişê kulturî hedef gêno û tewr zêde cinî û tutan hedef gêno. Êlih de komel bi polîtîkayê şerê taybetî reyde yeno rî bi rî. Êliho ke serranê 90an ra heta nika bi kiştiş û întîxarê cinîyan keweno rojeve de nika zî tîryak û fuhuş zêde bîyî. Endama Meclîsê Partîye (PM) ya Partîya Herêma Demokratîke ya Şaran (DBP) Nurten Uzumcuye derheqê babete de qisey kerd. 

 

Êlih de polîtîkayê şerê taybet 

 

Nurtene da zanayîş ke Êlih serranê 90î de qezayêka şenik bî û dimayê ke dewî ameyî vengkerdiş bi hawayêkê cidî şar koçê Êlihî kerd û wina dewam kerd: “Dimayê veşênayîşê dewan şar ame Êlih de bi ca bî. A serran semedo ke teda zêde bî kiştişê cinîyan û întîxar pê ameyêne û nika zî fuhuş û tîryak zêde bîyî."

 

‘Asayîş çin o’ 

 

Nurtene ercnayîşê xo de wina vat: “Bi tîryak û fuhuşî bajar xeripîyayo. Ciwanî rayîr ra vejîyenê. Şuxilnayîşê emrê tîryakî heta kewto emrê tutîye. Vanê Êlih de asayîş est o la her roje parkan de cesedêk yeno dîyîş. Xeberê întîxarî vejîyenê. Dewlete nê kayê lêşinan bi zanayîş kena. Nê heme girêdayeyê şerê taybetî yê. Îqtîdar vera kiştoxê cinîyan de polîtîkayê bêcezaverdayîşî pê ana. Coka ra zî kiştişê cinîyan zêde beno. Kerdox polîtîkayê bêcezaverdayîşî ra hêz gênê.”

 

‘Ganî mekanîzmayê pawitişî bêrê awankerdiş’

 

Nurtene qiseykerdişê xo yê peyênan de dîyar kerd ke polîtîkayê ke îqtîdar pê ano hêrişê hemverê nasnameyê cinîye yo û wina peynî kerd: “Ganî ma vera nê hêrişan de mîyanê têkoşînî de bê. Ganî mekanîzmayê ke cinîyan pawenê bivejê raşte. Ganî cinî wayîrê zanayîşî ba û na babete de ganî xebatî bêrê kerdiş. Ma sey meclîsê cinîyan na babete de xeta têkoşînî awan kenê. Ma do vera hêrişan de têkoşîn gird bikerê.”