Melîke Aydin

 

ÎZMÎR - Kampanya îmzeyan ya Paştîdayîşê Morî yê Îzmîrî ke waştişê wa stargehê newe bêrê akerdiş û bi rêxistinê cinîyan reyde hemkarî bêra kerdiş kena, dewam kena. 

 

Paştîdayîşê Mor ke çarçeweya kampanyaya ‘Ti tena nîya paştîdayîşê Morî est o’ Îzmîr de kampanyaya îmzeyan a seba zêdekerdişê stargehan da destpêkerdiş xebata xo dewa kena. 

 

Îzmîro ke 5 mîlyon nufusê ci est o, tena 7 stargehî est ê. Cayo ke 100 hezar nufusê ci bibo de ganî stargehî zî bibê. Paştîdayîşê Morî bi waştişê wa qezaya tewr qelebalix a Konak û Karşiyakayî de stargeh bêrê akerdiş kampanya da destpêkerdiş. Îmzeyê çarçeweya kampanyaye de do aşma çeleyî de teslîmê şaredarîya bajarê girdî ya Îzmîrî bêro kerdiş. Do babeta stargehan de waştişê hemparîbîyayîşê şaredarîyan bêro kerdiş.

 

‘Waştişê stargehan ê seba Karşiyaka û Konakî’ 

 

Aktîvîsta Paştîdayîşê Morî Sehel Otoye da zanayîş ke Îzmîr de 2 mîlyonî ra zêde cinî ciwîyenê û tena 7 stargehî est ê û wina vat: “Kapasîteya înan zî pêroyî 187 a. Bi taybetî Konak û Karşiyaka de nufusêk zaf qelebalix est o. Waştişê ma no yo ke nê cayan de stargehî bêrê akerdiş. Ma do bi îmzeyan reyde şêrê şaredarîyan. Ma do derheqê şertê stargehê newe bêrê akerdiş de vajê wa bi cinîyan reyde zî pare bikerê.” 

 

‘Wa şert û mercê stargehan bêrê başkerdiş’ 

 

Sehele da zanayîş ke dewlete Peymana Stenbolî fesh kerda nêkerda kiştişê cinîyan pawena û dewamê qiseykerdişê xo de vat: “Ma her çend dinyayêka bê stargeh biwazê zî vera şîdetî de gama yewine ya ke cinîyan paweno yo. Nê cayî cayê muhîm ê. Cinî qet nêbo do asayîş de bê. Kesêk ke stargehan de xebetîyeno ame standê ma. Mi şertê uca pers kerd. Vat şertî bi xof ê. her kes wina vano. Şertê û mercê uca xeylê xirab ê. Ganî şertê cuye bêrê başkerdiş. Ganî hûmare bêra zêdekerdiş.” 

 

Sehele qiseykerdişê xo yê peyênan de dîyar kerd ke babeta akerdişê stargehan de şaredarî hîna zêde wayîrê însîyatîfî ya la zêde xo nêdana ver û venga berpirsîyarîya şaredarî û dezgehê berpirsîyarî kerd.