MÊRDÎN - Bi vengdayîşê TJAyî Mêrdîn de eşkerayîye ameye dayîş û dima ra zî pêwa astengîyê polîsan rayîr ra şîyayîş ame kerdiş. Cinîyan çalakî de da zanayîş ke do hemverê şîdetî têkoşînê xo dewam bikerê.

 

Çarçewaya 25ê Teşrîna Peyêne de Mêrdîn de Têgêrayîşê Cinîyê Azade (TJA) eşkerayîye ameye dayîş û dima ra rayîr ra şîyayîş ame organîzekerdiş û Komîsyonê Cinîyan ê Komeleya Heqê Merdiman (ÎHD) ê Mêrdînî zî eşkerayîyêke da.

 

Pêwa astengîyan rayîr ra şîyî

 

Bi vengdayîşê TJAyî cinîyê Mêrdînî Parkê Karayollari de kom bîyî. Parlamentera Partîya Têduşt û Demokrasîyî yê Şaran (HEDEP) Bêrîtan Guneş Altin zî tewrê çalakîya cinîyan bîye. Cinîyan çalakî de pankartê "Bi jin jiyan azadî reyde ver bi 25ê Teşrîna Peyêne” akerdî. Sewbîna dowîzê sey “Pawitişê xoser heq o", “Cinîyê ciwanî hemverê şîdet û desteştişî xo ver danê” û “Kiştişê cinîyan polîtîk o” wedarnayî. Sewbîna fotografê cinîyê xoverdayox zî çalakî de ameyî berzkerdiş. Çalakî de cinîyan sloganê “Jin jiyan azadî” û “Biciwîyo xoverdayîşê cinîyan”  berz kerdî. Metnê eşkerayîye hetê aktîvîsta TJAyî Ayşe Bozan ra ame wendiş. 

 

Ayşe eşkerayîye de qalê têkoşînê wayanê Mîrabal kerd û bale ante serê şîdetê hemverê cinîyan û vat: "Tirkîya de her 10 cinîyan ra 4 cinî bi şîdetê camêrdî reyde rî bi rî manenê. Dewlete zî nê hêrişkaran pawena. Pawitişê kiştoxê cinî û tutan reyde verê qetilkerdişî akeno. Cinî tu wext betalkerdişê Peymana Stenbolî û tecrîdê zîndanan qebûl nêkenê. Do her tim xo ver bidê. Ma cinî do hemverê destdergî û şîdetî têkoşîn bikerê û ma do her tewir şîdetî hemverê cinîyan de deşîfre bikerê."

 

Dimayê eşkerayîye parlamentere Bêrîtan Guneş Altin zî qisey kerd û bale ant serê xoverdayîşê cinîyan û dîyar kerd ke tu wext fek têkoşîn ra vera nêdanê.

 

Pêwa astengîya polîsan cinîyan rayîr ra şîyayîş organîze kerd  û heta verê awanîya Partîya Demokratîke ya Şaran (HDP) ê Mêrdinî bi sloganan rayîr ra şîyî.

 

ÎHDyî de eşkerayîye ameye dayîş 

 

Komîsyonê Cinîyan ê ÎHDyî yê Mêrdînî awanîya komeleyî de eşkerayîyêke da. Avûkate Gulistan Duran metnê eşkerayîye wend û da zanayîş ke do her tim verê têkoşînê cinîyan de bê.