ÎZMÎR - Jinart Huner çarçeweya 25ê Teşrîna Peyêne de do dengbêjê cinî bivejîyê serê sehneyî. Konserê Jinart Hunerî do 26ê Teşrîna Peyêne de pê bêro û 5 dengbêjê cinî bivejê sahne. 

 

Jînart Huner bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan do 26ê Teşrîna Peyêne de Îzmîr de konserêk 5 dengbêjanê cinîyan pê bêro. Konsero de do Dengbêj Xalîde, Dengbêj Mevlude, Denbêj Îpek, Evîn Sindî û Eylul Nazliere deyîranê xo bivajê û Dêrê Azîz Vukolosî de saete 19.00î de do konser dest pêbikero. 

 

Dengbêj Eylul Nazliere da zanayîş ke dengbêjê cinî seba ke xo bidê qebulkerdiş bedelê girdî dayî û têkoşînê hunerî yê cinîyê kurdî dewam keno. Eylule venga heme hezkerdoxê hunerî kerd ke tewrê konserî bibê. 

 

‘Dengbêjê cinî benî vengê cinîyan’ 

 

Eylule da zanayîş ke dengbêjî bi serran o sey kulturê camêrdî yeno zanayîş û wina dewam kerd: “La wina nîyo. Nimune babete eşqe biba tena camêrd nê hîsan vano. Wexto ke babete şer bibo reyna çimanê camêrdan ra yeno pêhesnayîş. La hîs û ewnîyayîşê cinîyan zî est o. wazenê biresnê. Cinîyê dengbêjî zî hîs, problem û cuya cinîye bi rayîrê dengbêjîye vanê.”

 

‘Cinîyê dengbêjî bedel dayî’ 

 

Eylule dîyar kerd ke cinîyê dengbêjî seba ke komel de bêrê qebulkerdiş dejê girdî antî û bedelê giranan dayî û wina qiseykerdişê xo dewam kerd: “Ewro ma çend bi asanî deyîranê xo vanê. La hema tay cay est ê ke nêameyê qebulkerdiş. Ma eşkenê nê çîyî bişiknê. Ganî dengbêjê cinî bibê.” 

 

‘Ma têkoşînê hunerê cinîyan danê’ 

 

Eylule qiseykerdişê xo de wina vat: “Resnayîşê komelê kurdî bi rayîrê dengbêjîye ameyo awankerdiş. Çîyê ke ameyî waştiş ke bêrê vatiş bi rayîrê dengbêjîye vajîyayî. Tebîî qet şik çin o ke resnayîş de dengbêjê cinî bi hawayêkê xurt ca girewtî. Ma ewro sey dengbêjê cinî têkoşînê hunerî yê cinîyanê dengbêj ê ke tarîx de ca girewtî dewam kenê. Cinî tarîx de timî sere wedarnaya. Ma wazenê no serewedarnayîşî bidê vindarnayîş. Ma xoverdayoxê hunerî yê." 

 

‘Do deyîrî dewam bikerê’ 

 

Eylule qiseykerdişê xo yê peyênan de vat: “Îzmîr de kurdî zêde est ê û vera ke zanê kurd ê zî semedo ke Kurdistan ra dûrî yê kulturê xo ra zî dûr mendî. Xo nêresnenê kulturê xo. Seba ke ma na têkilîye awan bikerê ma bername xo zî domnenê. Ma wazenê ke hemwelatijî kulturê xo ra dûrî nêkewê. Amancê bernameyê ma zî caardişê yewbînan tepiştişî yo.” 

 

Eylule seba konserê 26ê Teşrîna Peyêne venga tewrbîyayîşî bi heme heskerdoxê hunerî kerd.