MERKEZÊ XEBERAN - Şengal de bi wesîleya 25ê Teşrîna Peyêne semînerêk ame organîzekerdiş. Semîner de bale dîya serê rolê cinîyanê êzidîyan ke  têkoşînê azadîye de yê. 

 

Qezaya Sîba Şêx Xidirê Şengalî de bi wesîleya 25ê Teşrîna Peyêne Roja Mîyanneteweyî ya Têkoşînê li Vera Şîdetê Cinî de semînerêk ame organîzekerdiş. Semîner hetê Endama Îdarekarîya TAJÊ dayê Neam Bedel û Hemsereka Heyetê Îdarekarîyê Şengalî Riham Hesen ra ame dayîş.

 

Riham Hesen destpêk de qisey kerd û vat: "Êdî cinîyê êzidî seke verê nîyê û hêzê înan ê têkoşînî zêde bîyo. Cinîyê ma yê êzidî vanê, eke bi ma zî nêbo, ma do Şengal terk nêkerê. Nê cinîyan îradeyê xo nas kerdê. TAJÊ hemverê esîr girewtiş û remnayîşê cinîyê êzidî xo rêxistin kerd. Nika zî serre bi serre no têkoşîn pîlêr û xurtêr beno. Rayber Apo rayîr cinî rê akerd, lazim o cinî zî xo nêzdîyê fikrê ey bikerê. Rayber vano, azadîya cinî, azadîya komelî yo. No vatişê Rayber Apo tenê vatiş de nêmendo, kewto pratîk zî. Nê sîstemo ke ameyo awankerdiş de cinî eşkena xoser biciwîya."

 

Dimayê qiseykerdişê Riham Hesen, Endama Îdarekarîya TAJÊ Neam Bedel zî vat: “Bi hezar serran cinî şarê xo rayîr ra berdêne, serkêşî kerdêne. La dimayê serdestî û zilm virazîya, nê heqê cinî zî dest ra girewtî. Binê nameyê şerm, namûs û xeylêk çîyê bînî de heqê cinî destê aye ra ame girewtiş. La nika têgêrayîşê ma virazîyayo û ma xêrê ci eşkenê rojanê wina bîyarê vîr. Na roje, roja têkoşînê vera zilimkarî ya.”