Şehrîban Aslan

 

AMED - Sereka DAKAH-DERî Avûkate Asli Pasînlîye têkoşînê vera şîdetê serê cinîyan ercnaye û dîyar kerd ke Tirkîya de cehd yeno kerdiş ke sîstemêk ke maneno Talîbanî bêro awankerdiş û wina vat: “Babeta têkoşînê vera şîdetê serê cinîyan de tena destkewtişê qanûnî nê ganî bedilnayîşê polîtîkayan zî verê çiman de bêro girewtiş.” 

 

Cinî ver bi 25ê Teşrîna Peyêne Roja Têkoşînê Vera Şîdetê Serê Cinîyan de têkoşînê xo benê raşteyan û kuçeyan de bi bîlbord û afîşan de mesajê xo yê vera şîdetî dorme xemilnayî. Sereka Komeleya Rewşa Paştîdayîşê Cinîye (DAKAH-DER) avûkat Asli Pasînlîye têkoşîn û astengîyê vernîya têkoşînê cinîyan ercnaye.

 

‘Şîdet parçeyêk polîtîkaya dewlete yo’ 

 

Asliye da zanayîş ke têkoşînê cinîyan destkewtişê qanûnî ra xoser nîno fikirîyayîş û wina dewam kerd: “Belkî ma wayê Mîrabelî seba 25ê Teşrîna Peyêne sey start qebul kenê. La têkoşînê cinîyan bi serran o tarîx de xo bîyaye kerdo. Cinîyan têkoşînê cidî da û açarnayî destkewtişan. Heqê weçînayîşî ra bigêrê heta şuxilnayîşê heqê peyname, heqê nefeqe û fekverdayîşî xeylê hukmê qanûnî est ê. şîdet parçeyêk polîtîkayê dewlete yo.”

 

‘Derheqê bîyayîşê cinîye de tehlukeyêk babeta vatişî ya’ 

 

Asliye dîyar kerd ke wexto ke merdim Tirkîya û dinya ra ewnî yeno muhafazakarîyêk cidî babeta vatişî ya û vat: “Tirkîya de zî cehdkerdiş est o ke sîstemêk ke maneno yê Talîbanî bêro awankerdiş. Tirkîya de prosesêk cidî yê derheqê laîkbîyayîşî de est o. Nameyê huqûqê îslamî nêro dayîş zî bi hawayêkê fîîlî pê yeno. Derheqê bîyayîşê cinîye de tehlukeyêk babeta vatişî ya. Tirkîya de feqîrîyêke cinîye vejîyeno raşte. Feqîrîya cinîye sey problemêk cidî yê vernîya têkoşînê vera şîdetî yo.” 

 

‘Polîtîkayê pelçiqnayîşê serê cinîyanê kurdan ra dest pêkeno’ 

 

Asliye bale ant serê şerê dinya ke yeno rayîr ra berdiş û wina qiseykerdişê xo peynî kerd: “Seke her kes zano kesê ke şerî ra tewr zêde tesîr benê cinî ya. Ma seba cinîyanê kurdan sernameyêk cîya nêfikirîyenê. Çike qeyûman reyde dezgehê cinîyanê kurdan ameyî girewtiş. Çalakîyê cinîyanê kurdan, xebatê înan yenê krîmînalîzekerdiş. Tirkîya de ma têkoşînê cinîyan ra biewnê. Serê polîtîkayê dewlete de bi taybetî polîtîkayê pelçiqnayîşê serê têkoşînê cinîya kurde ra dest pêkeno. Ma derheqê babete de xeylê nimuneyan dî. Coka ra zî dewamê hêrişanê serê cinîya kurde bajarê rojawanê welatî de zî yeno dîyîş.”