Rabîa Onver

 

COLEMÊRG - Cinîyê Colemêrgî dîyar kerdî ke bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan têkoşînê xo bi felsefeya ‘Jin jiyan azadî’ gird bikerê. 

 

Têgêrayîşê Bedilnayîşê Komelî ra Wayê Mîrabelî ke vera dîktatorîya Turjîllo ke Komara Domînîkî rayîr ra berdêne 25ê Teşrîna Peyêne 1960î de hetê hetgirê dîktatorî ra ameyî tecawuzkerdiş û qetilkerdiş. Cinî a roje ra nata raşteyan de vera dewlet-camêrdî de têkoşîn kenê. 

 

Colemêrg de cinîyê TJA û STKyî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan mesajê berzkerdişê têkoşînî dayî.

 

‘Têkoşînêk gird û pîroz est o’ 

 

Aktîvîsta Têgêrayîşê Cinîyê Azade (TJA) Şadîye Kirmizigule dîyar kerd ke 25ê Teşrîna Peyêne Roja Têkoşînê Vera Şîdetê Serê Cinîyan rojêke tarîxî ya û tena 25ê Teşrîna Peyêne de nê cinî her tim vera şîdetî de têkoşîn kena û wina vat: "Têkoşîno ke cinî dana Sarayan, Nagîhanan û Jîna Emînîyan ra yeno. Têkoşînêk gird û pîroz est o. Teda û şîdetê serê cinîyan dewam keno. Cinî qerarê ke sîstem dano vera yenê qetilkerdiş. Tebîî qet şik çin o ke cinî vera nê polîtîkayanê lêşinan de xover dana." 

 

‘Têkoşînê ma dewam keno' 

 

Şadîyeye wina peynî ard: "Ma sey cinîyê ke raşteyan de xo ver danê û têkoşîn kenê, ma do vera her tewirê teda û şîdetî de têkoşîn bikerê. Ma soz danê. Ma do têkoşînê xo her raşteyî de gird bikerê. Ma qetilkerdişê cinîyan nêwazenê, coka ra têkoşîn kenê. Heta ke cinî xo rêxistin bikera do her tim ser bikewa."

 

‘Cinîyê Kurd vera tedayan de têkoşîn kenê’ 

 

Hemsereka Komeleya Huqûqnasê Seba Azadîye (OHD) ya Colemêrgî Cevahîr Agraliye zî da zanayîş ke 25ê Teşrîna Peyêne şexsê Wayê Mîrabelan de heme dinya de bi çalakî û bernameyan yena pîroz kerdiş û nê ercayîşan kerd: "Têkoşînê Wayê Mîrabele vernîya ma keno roşna. Têkoşînê ma her raşteyî de dewam keno. Fehmê têkoşînê ma ewro dinya de bîyo sloganê cinîyan, sembolê ‘jin jiyan azadî’. Vejîyayîşê nê sloganî tesaduf nîyo. Têgêrayîşê cinîyê kurdî bi serran seba azadîye têkoşîn kerd. Vera heme tedayan de cinîyê kurdî têkoşînê xo rayîr ra berdî."

 

‘Bi serrran o ma têkoşîn kenê’ 

 

Hemsereka Komeleya Heqanê Merdiman (ÎHD) a Colemêrgî Sîbel Çapraze dîyar kerd ke cinî her raşteyî de vera şîdetî de têkoşîn kerd û vat ke cinî keye de, kargeh de, hetê hukmî ra şîdet vînena. Sîbele zî nê ercayîşan kerd: "Sîstemê hukmê camêrdan paweno. Ma dewayê peyênan de nê çîyî dî. Ma cinî vera nê caardişan de bêveng nêmanenê û têkoşînê xo dewam kenê. Her raşteyî de heqê cinîyan yeno xespkerdiş. Bi serran o ma têkoşîn kenê û ma do têkoşîn bikerê."