Rozerîn Gultekîn

 

ŞIRNEX - Şirnex de cinîyan seba 25ê Teşrîna Peyêne Roja Têkoşînê Vera Şîdetî de venga tewrbîyayîşê çalakîye kerdî û vatî: “Wa cinîyê Botanî bi tilîlîyê xo a roje raşteyan de bê.” 

 

Xebatê 25ê Teşrîna Peyêne Roja Têkoşînê Vera Şîdetê Serê Cinîyan de bê maben dewam kenê û emser do cinî vera krîz, şîdet, feqîrî, şer, bedilnayîşê qanûnê bingeyîn de vengê xo berz bikerê. Hemşaredara Cizîrî Berîvan Kutluye ya ke qeyûm tayînê herinda aye bîbî û hemsereka DBPyî ya Şirnexî Zîlan Yalmane derheqê çalakîyê 25ê Teşrîna Peyêne yê Şirnexî de veng kerdî. 

 

‘Heme cinî bi xoverdayîşî pêşwazî kenê’ 

Berîvan Kutluye da zanayîş ke prosesê 25ê Teşrîna Peyêne ra ver bi sloganê "jin jiyan azadî" şorişê cinîye gird beno û heto bîn de zî îqtîdar polîtîkayê qirkerdişê cinîyan xorî keno û wina vat: “Tarîxêk têkoşînî yê cinîyanê kurdan est o. Seba tedaya serê cinîyan peynî biba ma gam erzenê. Serra 2023yî de zî qirkerdişê cinîyan yeno ciwîyayîş. No girêdayeyê tecrîdî pê yeno. Ma wirdî babetan nêeşkenê yewbînan de cîya bikerê. Ma vera nê de bi sloganê ‘jin jiyan azadî’ kampanya da destpêkerdiş. Kişta înan de ma xebatê 25ê Teşrîna Peyêne rayîr ra benê. Tirkîya de nimuneyê tedaya serê cinîyan cayêk bîn de çin o. Wazenê şexsê cinîya kurde de komel çinî bikerê. Vera nê de cinîyê kurdî bi xoverdayîşî 25ê Teşrîna Peyêne pêşwazî kenê.”

 

‘Azadîya cinîye girêdayeyê azadîya Birêz Ocalanî ya’ 

 

Berîvane wina qiseykerdişê xo peynî kerd: “Seba şîdetê serê cinîyan peynî bibo her roje seba ma 25ê Teşrîna Peyêne ya. Vera şîdet û qetilkerdişê cinîyan de bêvengîyêk est o. şîdet se beno wa bibo ganî vera ci de veng bêro vetiş. Ganî sebebê qetilkerdişê cinîyan bivejîyo raşte. Ez venga cinîyê Şirnexî kena, ma pîya vengê xo berz bikerê. Azadîya cinî girêdayeyê azadîya Abdullah Ocalanî ya. Coka ra ganî ma tecrîdî bişiknê.”

 

‘Ma venga cinîyê Botanê kenî’ 

 

Hemsereka DBPyî ya Şirnexî Zîlan Yalmane zî da zanayîş ke do 25ê Teşrîna Peyêne de raşteyan de bê û veng da: “Ma venga cinîyê Botanî kenê. Ma vera qirkerdişê cinîyan, şîdet, polîtîkayê bêcezaverdayîşî, polîtîkayê şerî û heme tedayê serê şarê Botanî de raşteyan de bê. Kurdistan de vera cinîyan de polîtîkayê şerê taybetî yeno rayîr ra berdiş. Ganî ma vera nê sîstemî de vengê xo berz bikerê. Ma venga heme cinîyê Botanî kenê ke 25ê Teşrîna Peyêne de raşteyan de bê.”