Elfazî Toral

 

STENBOL - Sevgî Telcî Ercane ya ke yew serrî kanserê memikan ra ameye dermankerdiş, o wext zî 25ê Teşrîna Peyêne û 8ê Adare de raşteyan nêterikna. Sevgîye zorê kanserî bi têkoşîn û paştîdayîşê cinîyan berd. Sevgîye wina vana: “Nêweşî nîna na mana ke merdim mabenê bido têkoşînî. Nika ma şinê 25ê Teşrîna Peyêne û vera heme zor û zehmetîyan.” 

 

Ver bi 25ê Teşrîna Peyêne cinî her raşteyê cuye de têkoşînê xo gird kenê. Sevgî Telcî Ercane zî înan ra yew a. Sevgî zorê nêweşîya kanserî berd û têkoşînê xo dewam kena. Sevgîya ke tu rey fek têkoşînê azadîye ya cinîyan ra nêverda 25ê Teşrîna Peyêne û 8ê Adare de raşteyan de bîye. Sevgîye dermanê nêweşî û têkoşînê xo ajansê ma rê vat. 

 

Cuya xo serê xoverdayîşê cinîye awan kena 

 

Sevgî Tokat de yena dinya û Stenbol de ciwîyena. 7 tutê aye est ê. Serra 2021î de bi nêweşîya kanserê memikan kewena. Dermankerdişê aye heta aşma Temmuza 2022î dewam kena. Bi 4 wayê xo reyde Stenbol de 20 serrî yo ke dikan akerda û xebetîyena. Cuyêka komunal rayîr ra bena. Sevgîye dîyar kerd ke qiraltîyêk înan ê cinîyan ê şenik est o û vat ke cuya xo her tim serê xoverdayîş û têkoşînî awan kerda. 

 

Prosesê dermankerdişî de raşteyan de bîye

 

Sevgîye da zanayîş ke nêweşîya xo ra ver her raşteyî de têkoşînê cinîyan rayîr ra berdêne û wina ercnayîş kerd: “Wextê dermankerdişî de zî mi raşteyan nêterikna. Proseso ke ez ameyêne dermankerdiş de tewrê 25ê Teşrîna Peyêne û 8ê Adare bîya. Ez xoverdayîşê cinîyan ra hes kena. Ma 12 cinîyê ke koma ma est a, yew serrî yo vera polîtîkayê şîdet û pelçiqnayîşî de Taksîm de yenê têhet û tewrê bernameyan benê. Nêweşî nêna na mana ke merdim maben bido têkoşînê xo. Têkoşîn ganî her tim bibo. Ma cinî timî raşteyê cuye de têkoşîn kenê. Coka ra mi qet xo nêda hetêk. Mi xo nêweş nêdî. Eke mi wina bikerdêne ez do hîna zêde nêweş bibayêne.” 

 

Paştîdayîş hêvîye honena… 

 

Sevgîye ard ziwan ke bi wesîleya paştîdayîşê cinîye her roje cuye û hêvîyêke newe yena honayîş û wina dewam kerd: “Bi wesîleya paştîdayîşê cinîye her roje cuye û hêvîyêke newe yena honayîş. Prosesê nêweşîye de mi hem nêweşî têk berd û hem zî mi hîna zêde têkoşînê xo rayîr ra berd. Seba dinyayêka azade ganî ma qet fek têkoşînî ra vera nêdê. Hêzo ke cinî danê yewbînan xeylê muhîm o. Ma cinî yewbînan ra hêz gênê. Ma cinî cuyêka komulan rayîr ra benê. Ma yewîye ra hêz gênê.” 

 

Tewrê çalakîyanê HEDEPyî bîye

 

Sevgîye dîyar kerd ke vernîya nêweşîye zî tewrê çalakîyê cinîyan yê HEDEPyî bîya û wina vat: “Vernîya nêweşîye zî ez zaf aktîf bîya. Tewrê çalakîyê cinîyan yê HEDEPyî bîyene. Çi destê mi ra ame mi kerd. Ez hewl dana paştdayîş bidî pêro çalakîyê cinîyan.”

 

‘Moralê mi her tim ca de bi’ 

 

Sevgîye qalê nêweşîya xo kerd û wina vat: “Mi nêweşî rojêke ferq kerd. Ez şîya doktor. Teşîsê kanserî dayî. Dima ra emelîyat bîya û dest bi kemoterapî kerd. 6 aşmî kemoterapî ame kerdiş. Porê mi rijîya. La mi xo ra hes kerdêne. Ez xo ra bawer bîya. Moral û motivasyonê mi ca de bi. Qet bi tesîr nêbîya. Teşîsê rew bi naskerdişê bedenî mumkin o. Ganî pêro cinî bi hawayêkê azad biciwîyê. Tu wext fek têkoşîn ra vera nêdê. Ez venga pêro cinîyan kena ke 25ê Teşrîna Peyêne de cayê xo raşteyan de bigîrê.”