Dîlan Babat

 

ANQARA - Zeyno Bayramoglu şîdetê dewlet-camêrdî vera di lingê aye şikîyayî û 8 serrî yo tedawî bena. Zeynoye dîyar kerd ke vera mexdurîyetê 8 serrî de yew kes zî hesab nêda û vat ke bi polîtîkayê bêcezaverdayîşî yê hukmî reyde ameyî rî bi rî û vat: Yew mercîyêk ke ez gerre bikera çin o.” 

 

Şîdetê vera cinîyan bi polîtîkayê bêcezaverdayîşî yê hukmî vejîyayo sewîyeya tewr cor. Cinîyê ke vera ‘cinîya makul, seba cuye’ têkoşîn kenê zî bi tepiştişî reyde yenê tehdîdkerdiş. 

 

Serra 2016î de herêma Cerattpe ê Zozanê Kafkasorî ya Artvînî de cinîyê ke vera falîyetê madenî reaksîyon mojnabî raştê hêrişê şîdetin yê polîsan ameybî û mudaxaleyê înan kerdbî. No mudaxaleyê polîsan de Zeyno Bayramogluye wirdî lingê xo ra birîndar bî. Zeyno bi serran o pê gopal gêrena û demêk zî hemsereka HDPyî Anqaraye bî û sewbîna zî verfekîya cinîyan a rêxistina Anqaraye kerd. 

 

Zeynoye nika HEDEPyî de xebatan rayîr ra bena. Zeynoye şîdetê dewlete, polîs û hukmî û sewbîna zî têkoşîno ke dana ajansê ma rê ercnaye. 

 

HDKyî ra heta HDPyî nika zî HEDEP 

 

Zeynoye da zanayîş ke bi têgêrayîşê kurdî reyde Kongreya Demokratîke ya Şaran (HDK) nas kerda û vat îdeolojîya HDKyî seba şaranê Tirkîya xeylê muhîm o û coka ra HDKyî de ca girewta. Zeynoye wina dewam kerd: “Ez serra 2015î de ameya Anqara. Mi HDPyî nas kerd. Mi vat prosesê demokratîkbîyayîşê Tirkîya de ganî HDPyî de ca bigêra. Bawerî û vindertişê mi na hete de bî. Ez HDPyî, HDKyî sey partîyêk sîyasî yê kurdî nêvînena. Sey partîya heme şaran vînena. Eke demokrasî bêra bi nê adresî yena.”

 

Dermankerdiş do hema dewam bikero 

 

Zeynoye ercnayîşê xo de vat: “Şîrketêk peynîya serra 90î de Artvîn de cigêrayîşê madenî kerd. O wext ez Artvîn de bîya û tedaya şîrketî vera şîya. Heta ke AKP nêame cigêrayîşê madenî ma nêda zorî. Artvîn de vetişê madenî tesîrêk gird serê cuye de keno. Têkoşînêk ame destpêkerdiş. Hem têkoşînê îradeyê şarê Artvînî û hem zî têkoşînê ekolojîye ya Tirkîya ame dayîş. Di serran nobet ame tepiştiş. Nê semedî ra prosesêk madenî nêdîya destpêkerdiş. La AKP tewr peynî hêrişê uca kerd. Xoverdayîşê girdî virazîyayî. Kes teslîm nêbî. Venga Tirkîya ame kerdiş. Her kes ame Artvîn. O wext prosesê pirodayîşî herême de est bî. Artvîn de zî têkoşînê ekolojîye. Ma waşt ma rayîr ra şîyayîş pê bîyarê. La polîsan hêriş kerd. Ez bi hawayêkê mucîze uca de vejîyaya. Ez 8 metre erzîyaya. Wirdî lingê mi şikiyayî. Hîrê rojan Artvîn de menda. Fîgen Yuksekdag, Selahattîn Demîrtaş û Îdrîs Baluken wayîrê mi vejîyayî. Ez berda Anqara. 5 rojan de ez 6 reyan amelîyat bîya. Nika dermankerdişê mi dewam keno."

 

‘Yew mercîyêk ke ez gerre bikera çin o’ 

 

Zeynoye ard ziwan ke çîyê ke ciwîyaya vernîya têkoşînê aye nêgirewtî û wina vat: “Ez yew reye bi pratîkê hukmî yê polîtîkayê bêcezaverdayîşî reyde ameya rî bi rî. Îfadeyê mi yê Artvînî vînî bî, dima ra ame dîyîş û reyna vînî bî. No tena mi eleqedar nêkeno. No ameyo serêyê her kesî. Heme mehkemayan de dosyayê mi ame redkerdiş. Nika DMMEyî de yo. Bifikirê merdim hetê înan ra yeno birîndarkerdiş, seqet maneno û vera nê de mercîyêk ke ti gerre bikera çin o. Rewşa bîyaye de ganî ez mercîyan nêgêra. Ganî dewlete mi rê rayîr akera. A roje bi seyan cinîyî rayîr ra şîyayîş de est bî. Polîs hêriş kerd û şîdetêk gird pê ard.”

 

‘Ganî ma vengê cinîye hîna zêde rêxistin bikerê’ 

 

Zeynoye qiseykerdişê xo yê peyênan de wina vat: “Lazimîya ma bi têkoşînêk gird est o. tarîx de tu rey hende qetilkerdişê cinîyan nêameyo kerdiş. Her roje hîrê cinî yenê qetilkerdiş. polîtîkayê bêcezaverdayîşî est ê. Kiştoxî bi qanûnan yenê pawitiş û serbest yenê verdayîş. No zî şîdet zêde keno. Ganî her kes vera polîtîkayê bêcezaverdayîşî de vengê xo berz bikero. Ganî cinî xo rêxistin bikera. Her wextî ra hîna zêde têkoşîn bikera û rêxistinbîyayîş ferz o.”