Habîbe Eren

 

DÎLOK - Cevahîr Avcîya ke serra 1990î de semedo ke dewa aye ameye vengkerdiş tewrê keyeyê xo Perwarî ra koçê Dîlokî kerd, roja ke ameya tîya dest bi karê şikitişê gozan kerda. Cevahîra ke 30 serrî yo karê şikitişê gozan kena cehd kena ke îdareyê xo bikera û roje de bi heqê 4 sîmîtan xebetîyena. 

 

Dîlok ke bajarê meslekî û kede yo û her tim koç tede yeno kerdiş de zafane kesê ke ciwîyenê serra 1990î de dewanê xo ra ameyî koçberkerdiş û tede ca bîyî. Qezaya merkezî ya Şahînbeyî ke nufusê ci resena yew mîlyonî de hûmara sûrîyeyijan xeylê zêde ya. Kesê ke feqîr ê û cehd kenê bajar de bi ciwîyî, her tewirê binpaykerdişê kede reyde yenê rî bi rî. Hema vajê heme keyeyê qelebalix mecburê bişuxulî, cinî, tutî û extîyarî zî mîyan de. 

 

Cevahîr Avcîye serra 1990î de semedo ke dewa aye hetê hukmatî ra ameye veşênayîş bi keyeyê xo reyde koçber bîya û kesê ke koçê bajar kerdî ra yew a. Cewahîre dewa qezaya Berwarî ya Sêrtî ra koç bîya û Dîlok de ca bîya. Aye zî sey heme kesan koçberîye de binpaykerdişê kede reyde rî bi rî menena. Cewahîre hewl dana îdareyê xo bi şikitişê gozan bikera û 10 tutê aye est ê. Cewahîre zehmetîyê ke ciwîyaya bi nê vatişan vat: “Ma tepiştî, ma feqîrî û vêşanî dî. Ma nê bajaran de perîşan bîyî, tutê mi kaxizan çope ra arê danê. Torinê mi do amelîyat biba. Zehmet o la ez mecbur a nê şertan mîyan de zimistanî de bixebeta. Nêweşîya made û tansîyonî mi de est ê. ez xeylê nêweş a.”

 

Heqdestê aye roje de keno heqê simîtan 

 

Cevahîre ard ziwan ke 15 serran fistiq şikita û dima ra êdî fistiq bi makîneyan ameyo şikitiş û aye zî dest bi şikitişê gozan kerda û wina vat: “Seba her tewreyî 45 TL gêna. Ez tewr zêde roje de eşkena 1-2 tewre goze bişikna. Zimistano serdin de zehmet o. Ma gozê şikiteyan zî kenê panc tewir. Ganî nêrî têmîyankerdiş û wexto ke têmîyan bibî zî pereyê ma ra şiknenê. Ma tena eşkenê mîyanê 7-8 saetan de yew tewre bişiknê. Ma serê sibayî dest bi şikitişê gozan kenê û heta şewe nê karî kenê. Karêk zehmet û zor o. Ge-ge wexto ke ma yewbînan ra cîya kenê ma şaş kenê. Tutêke min a astengdar est a. Ez bi şikitişê gozan cehd kena ke seba îdareyê keyeyê xo bi mêrdeyê xo reyde biba hetkar. Mêrdeyê mi înşaat de xebetîyeno la nika nêeşkeno nê karî bikero û semedo ke emrê ci zêde yo kar nêdanê ci. Çîyêk ke ma pê îdareyê xo bikerê çin o.”

 

'Ez ne şîya mabendayîş û ne zî mi Dîlok dî’ 

 

Cevahîre ard ziwan ke asayîşê înan ê komelkî çin o û kartê xo yê kesk ê verên betal kerda û wina vat: “Vatî kênaya xo wanena û eşkena biewna to. Kênaya mi bi zehmetî îdareyê xo kena, nêeşkena îdareyê xo bikera do senî ma miqate bikera? Heta ewro qet nêşîya mabendayîş û nêşîya Dîlok. No karê ma yo. Ganî ma herdaîm bixebetê. Mi rojêk zî boya xo nêdayo. Ma her tim binê zilm, nêweşî û tenganîye de yê. Ma her tim mîyanê belengazîye de yê.”

 

'Ganî her kes welatê xo de biciwîyo' 

 

Cevahîra ke wazena dinya biba cayêk weş, tewr peynî wina vat: “Ganî her kes welatê xo de bi ciwîyo. Ez serkewtişî ma hemine rê wazena. Ma wazenê zilm û zorî peynî bibê, berê zîndanan abibê û tepişteyî azad bibê.”