Marta Somek

 

STENBOL - Çar cinîyê ke rojbîyayîşê Rayberê PKKyî Abdullah Ocalanî de de vilikî eştî Gula Kuçukçekmeceye rê dewa ame akerdiş. Hemsereka MATUHAY DERî Dîlek Demîr Sonmeze qisey kerd û vat ke bi akerdişê dewaye nêeşkenê vernîya waştişê azadîye bigîrê û vat ke heta azadîya Abdullah Ocalanî pê nêra do têkoşîn bikerê. 

 

Endamê Însîyatîfê Dadîyê Aştîye yê Stenbolî û dadîyê ke nobeta edaletî gênê, 4ê Nîsane de bi wesîleya rojbîyayîşê Rayberê PKKyî Abdullah Ocalanî vilikî eştî Gola Kuçukçekmeceyî. Hemsereka Komeleya Paştîdayîş û Hetkarîya Merdimê Tepişteyan yê Anadolu (ANYA KAYDER) Evîn Genç û Hemsereka Komeleya Hetkarîya bi Keyeyê Tepişteyan ya Marmaraye (MATUHAY DER) Dîlek Demîr û xeylê cinîyê bînî zî tewrê bernameyî bîbî. 

 

 

Dadî, taxa Kanarya ra ver bi Raşteyê Guvercînî ra rayîr ra şîbî û eşkerayî dabî. Dadîyan dima ra bi sloganan vilik û qerenfîl rona. Dimayê ci polîsan cinî û rojnameger kerdî binê abluqa. Dadîyan reaksîyon mojna abluqa. Polîsan dadîyê nobeta edaletî Fînce Akman û Cemîle Çîftçî, hemsereka ANYAKAY DERî Evîn Genç û hemsereka MATUHAY DERî Dîlek Demîre destbend kerdî. 

 

Serdozgerîya Komare ya Kuçukçekmeceye 12ê teşrîna verêne de derheqê Fînce Akman, Cemile Çîftçî, Kumrî Akgul, Evîn Genç û Dîlek Sonmez Demîre de îdîaname amade kerd. Çarçeweya tehqîqatî de, îdîaname de berzkerdişê sloganan suc ame hesibnayîş û ame waştiş ke her çar cinî bêrê cezakerdiş. Îdianame 13ê Teşrîna Peyêne de hetê Mehkemaya Cezaya Aslîye ya Kuçukçekmeceyî ra ame qebûlkerdiş. 

 

Hemsereka MATUHAY DERî Dîlek Sonmez Demîre derheqê îdîanameyo ke ame amadekerdiş û têkoşîno ke vera tecrîdî ra rayîr ra benê JINNEWSî rê qisey kerd. 

 

Amancê çalakîye vera tecrîdî de berzkerdişê vengî bî 

Dîleke da zanayîş ke 4ê Nîsane de roja rojbîyayîşê Rayberê PKKyî Abdullah Ocalanî de bi dadîyê aştîye reyde qerenfîl eştî Gola Kuçukçekmeceyî û vat: “Amancê ma no bî ke ma bale biancî tecrîdê serê Birêz Ocalan û tesîrê tecrîdî ke heme komel û zîndan de vila bîyo ser. Ma waşt ke vera tecrîdo giran de vengê xo berz bikerê. Welatê ke huqûqê gerdunî pê yeno de şertê tecrîdo giran çin o. Çi heyfo ke welato ke ma tede ciwîyenê de metodê huqûqê gerdunî, qanûnê welatî nînê naskerdiş û hetê îqtîdarîyêk faşîzm û zalim ra qanûn yenê vetiş. Qanûnê xo nas nêkenê. Îdîanameyo ke ameyo amadekerdiş zî nê nizdîbîyayîşî ra pê yeno.”

 

‘Do têkoşîn dewam bikero’ 

 

Dîleke ard ziwan ke derheqê înan de îdîaname bêro amadekerdiş zî ê do vera nê polîtîkayanê teda û tecrîdî de têkoşîn bikerê û heta azadîya fîzîkî ya Abdullah Ocalanî pê nêra do waştişê xo bîyarî ziwan û vat: “Fikrîyatê Abdullah Ocalanî tena hetê kurdan ra nê hetê heme şaran ra yeno qebulkerdiş. Rejîmo çimsûre û faşîst ê AKP-MHPyî seba bîyayîşê xo derg bikero nê çîyî qebul nêkeno. Zanê ke do paradîgmaya serekatî nê welatî de aştî pê bîyara. Coka ra vera zextan de do têkoşînê ma dewam bikero.”

 

Seba cinîyan veng! 

 

Dîleke qiseykerdişê xo yê peyênan de bale ant tecrîdê serê komelî ser û wina peynî kerd: “Ekonomîye ra bigîrê heta ekolojîye, cinîyan ra bigîrê heta xozaye qirkerdişêk gird est o. Ez venga heme cinîyan kena. Bêrê ma pîya nê îqtîdarîyê lêşin bierşawê. Rayîrê cuya hempare ya bi azadîya fîzîkî ya Abdullah Ocalanî mumkun o. Seba azadîya serekatîye ma pîya têkoşîn bikerê.”