Pelşîn Çetînkaya

 

ÊLIH - Roza Berîtan Kanate ya ke nameyê xo vera xeylê reyan raştê hêrişê nîjadperestîye ameye, her çend ke îmtîhan de 98 puan bigêra zî nameyê xo yê kurdî vera nêgirîya unîversîte. 

 

Roza Berîtan Kanate ya 19 serrî Êlih de ciwîyena û nameyê xo vera xeylê reyan raştê astengîyan ameya û hêrişê aye ameyo kerdiş. Emrê şenik de mekteban de bi nîjadperestîye reyde ameya rî bi rî û tewr peynî zî mulakatê unîversîteye de rewşêk winasî ameya sereyê aye. Berîtane dîyar kerd ke vera çinîkerdişê nasnameyî de ganî kultur û tarîxê kurdî bimusnî. 

 

‘Nameyê xo vera mulakat ra derbaz nêbî’ 

 

Berîtane bado ke lîse qedênena kewena îmtîhanê unîversîte û ser kewena. Serra 2022yî de îmtîhanê xêzkerdişî ra 98 puan gêna û mîyanê 700 kesan ra bena diyîne. Berîtane wina vat: “Ez unîversîteya Ataturkî de kewta mulakat la nameyê xo vera mi nêgirewtî. Nê caardişan vera ewnîyayîşê mi yê vera unîversîteye bedilîya. Mi tercîh nêkerd. Verê cû mi waştêne ez biba mamoste la nika fikrê mi bedilîyayo.”  

 

‘Vatî nameyê to Berîtan a’ 

 

Berîtane da zanayîş ke şenikîye ra nameyê xo vera raştê zext û bêtêduştî ameya û wina dewam kerd: “14-15 serrî ye de ez kewta mîyanê baskê ciwanan a partîye. Mi mîtîngê weçînayîşî de qertê wezîfedarî girewt. 3 polîsî venga mi kerdî û nameyê mi persayî. Mi nameyê xo vat. La înan vatî, no nameyê to yê nasnameyî yo û ez berda. Nasnameyê mi waştî. Mi vat 16 serrî ya, mi nesnameyê xo nêgirewt xo ser. Mi TC înan rê vat. Polîsan ewnîyayî nameyê mi û her hîrê polîsî şîdet bi mi kerdî.” 

 

Berîtane dîyar kerd ke dimayê îşkenceyê polîsan aye hîşê xo sero ra şîya û embazê aye aye berdî nêweşxane la semedo ke polîsan aye kuyayî doktor nêewnîyayo û derman nêkerdo. Berîtane wina dewam kerd: “Wextê mektebê mîyanenî de mektebê mi kişta lojmanê leşkeran de bî. Coka ra ma her tim bi keyeyê leşkeran reyde ameyêne rî bi rî. Reyêk ma kurdî qisey kerd û kesêk bi embazê xo reyde kerra eştî ma. Ma rê vatî kurdî qisey mekerê Tirkî qisey bikerê.”

 

‘Semedo ke ez kurd bîya reaksîyon mojnayî’ 

 

Berîtane qiseykerdişê xo yê peyênan de wina vat: “Mi Kolejê Sinav ê Êlihî de lîse wend. Tutê polîs, leşker û mamosteyan zaf bî uca de. Keyeyê tirkî zêde bî. Sinif de tena nameyê mi kurdî bî. Dersê îngîlîzî de mamoste paragrafê kilm bi ma dayêne wendiş. Heme kes paragraf bi heriknaye wend û dore ameye mi. Her kes vat kurdbîyayîşê to zaf dîyar o. Dimayê dersî mi mabêne vist embazanê xo û xo de. Seke tehlukeyin ba ez ameya dîyîş. Reaksîyon mojnayêne. La ma kurdî tarîxêk ma yê gird est o. ganî ma kultur û tarîxê xo baş bizanê.”