Pelşîn Çetînkaya

 

AMED - Şîmel Beyîka ke prosesê krîzê ekonomîye ke ameyêne ciwîyayîş de koperatîfê cinîyan awan kerd, îmkan dana cinîyan ke tewrê prosesê berardişî bibê.

 

Şîdetê camêrd-dewlete her ke şino gird beno û vera nê de cinî têkoşînê xo dewam kenê. 25ê Teşrîna Peyêne nizdî bena û nika têkoşînê vera şîdetî hîna zêde rojeve de ya. Şîmel Beyîka ke Amed de koperatîfê cinîyan awan kerd, têkoşînê xo û cuya xo da destpêkerdiş. 

 

Nimune keda cinîye 

 

Şîmele 5 serrî verê cû kafeyêk unîversîteya Dîcleye de xebetîyaya û dima ra uca de lokanta akena. Şîmela ke werdê kafeyî fast food virazena û seba wendekaran cayê werdê keyeyî akerda û wina vat: “Cinî ekonomîye de cayêk muhîm gênê. Kargehan de camêrd hîna zêde yê. Vera nê de cinî xo pawenê. Ma cinîyan koperatîf awan kerd. Welat de çîyo tewr muhîm perwerdeyî û ekonomî yo. Çi heyfo ke demê peyênan de mîyanê perwerdeyî veng kerdî. Ciwanî kar nêvînenê. Xeylê mezunê unîversîte betal ê. Nînê tayînkerdiş. Ma xeylê embazî waştêne ke bibê wayîrê karî. La ekonomîye vera ma nêeşkayî çîyêk bikerê. Coka ra ma tay embazî koperatîf awan kerd.”

 

Ewnîyayîşê cînsîyetperestî bazirganîye de zî est o

 

Şîmele dîyar kerd ke komel de vera cinîyê ke xebetîyenê de ewnîyayîşêk tedawer est a û vat ke bazirganîye de zî ewnîyayîşê cînsîyetperestî est o. Şîmele wina vat: “Çi heyfo ke keda cinîye nîna dîyîş. Cinî hîna zêde kede dana la keda înan nîna dîyîş. Vanê ‘keyeyê xo de ronişe, vera camêrdana de sere çewt bikere, biewne tutan ra’. Ewnîyayîşêk wina est o.” 

 

'Cinî bi heskerdişî karê xo kena’ 

 

Şîmele dîyar kerd ke komele 6 aşmî verê cû awan kerdî û heme berardişê koperatîfî bi destê cinîyan yenê amadekerdiş û vat: “Gidayê hadre çinî yê. Cinî karê xo bi heskerdiş kenê. Coka ra zî sektorê ma yê werdî yê bînan ra cîya yo.” 

 

Şîmele ra seba cinîyan mesaj 

 

Şîmele qiseykerdişê xo yê peyênan de ard ziwan ke cinî bi serran o yena binpaykerdiş û hepsê keyeyî yena kerdiş û wina peynî kerd: “Nika rewşe dewam kena. Cinî bi hawayêkê modern hepsê keyeyî yena kerdiş. Ez bi wesîleya 25ê Teşrîna Peyêne nê mesajî dana. Wa cinî sere çewt nêkerê. Ferqê hêzê xo de bê. Wa nêkewê şikan mîyan ke ‘ez nêeşkena bikera’. Ganî cinî hêzê xo bimojna.”