Pelşîn Çetînkaya

 

AMED - Faîke Aktaşa ke nizdîyê 9 serrî yo lajê xo Veysî Aktaşî ke Îmraliyî de tepişteyo nêdîya wina vat: “Tecrîdê Îmraliyî ke pê yeno serê heme şarê Kurdî de pê yeno.”

 

Hîrê tepişteyê ke 16ê Adara 2015î de prosesê muzakerreya bi Rayberê PKKyî Abdullah Ocalanî reyde zîndanê Kirikaleyî ra sewqê zîndanê Tîpê Fyî yê Îmraliyî bîyî ra yew zî Veysî Aktaş bî. Veysî Aktaşî 8 serrî ra zêde yo bi dadîya xo reyde pêvşnayîş nêkerdo û sewbîna 3 serrî yo zî tu xeberêk ci ra nîna girewtiş. Keye û avûkatê Veysî Aktaşî seba pêvînayîşî muracat kenî la tu cewabêk nîna girewtiş. Muracatê ke yenê kerdiş zî bi bahaneyê cezaya dîsîplînîyenê redkerdiş. Dadîya ci Faîke Aktaş û waya ci Melîha Çetîne derheqê babeta tecrîdê giran ê Îmraliyî de qisey kerdî. 

 

 Nizdîyê 9 serrî yo lajê xo nêvînena 

 

 Faîkeye da zanayîş ke lajê xo Veysî Aktaşî ke Îmraliyî de binê tecrîdê giran de yeno tepiştiş ra bi serran o xebere nêgêna û wina vat: “Verê ke lajê mi sewqê zîndanê Îmraliyî bikerî, ma qet nêbayêne ke bivînî. Dima ra ke şî ma qet xebere ci ra nêgirewt. Ez lajê xo zaf meraq kena. Mi bi desan reyna seba pêvînayîşî muracat kerd ka muracatê ke ameyî kerdiş ameyî redkerdiş.” 

 

 ‘Caardişê ke tu cayêk de çinî yî yenê dîyîş’ 

 

 Faîkeye dîyar kerd ke Îmraliyî de caardişê ke tu cayêk de nînê dîyîş estî û wina dewam kerd: “Îmraliyî de tecrîd esto. No tecrîd serê Rayberê şarê Kurdî Abdullah Ocalan, serê lajê mi û serê heme şarê Kurdî de pê yeno. Ez tecrîd vera lajê xo nêvînena. Xebere ci ra nîna girewtiş. Nêzana weş o ya nê. Ez xeylê meraq kena. Hewn nêkeweno çimanê mi.” 

 

 Ganî tecrîd peynî bibo 

 

Faîkeye ard ziwan ke tecrîdo giran ê Îmraliyî ke dîyayo dest pêkerdiş tesîrê xo serê heme şarê Kurdî de kerdo û wina peynî kerd: “Mi yew serrî verê cû mêrdeyê xo vînî kerd. Seba Veysî bêro cenazeya pîyê xo ma destur waşt û ma waştiş kerd. Waştişê ma aştî yo. Aştîye ra weşikêr tu çîyêk çinî yo. Ma vanê aştî dewleta tirke vana ‘şima kam î ke ma şima nas bikerî’. Ma aştî û seyyewbînanî wazenê. Ganî bi lezkî no tecrîd peynî bibo.” 

 

Caardişê teberêmerdimîye! 

 

Waya Veysî Aktaşî Melîha Çetîne zî da zanayîş ke wexto ke Veysî Îmraliyî de bî yew reye pêvînayîş kerdî û bi tecrîdî reyde pêvînayîş nêkerdî, tu xeberêk ci ra nîna girewtiş. Melîhaye qala pêvînayîşê Îmraliyî zî kerd û vat: “Ma hîrê saetan serê awe ra pê keştîye kewtî rayîr. Dima ra ma keştîye ra peya bîyî û bi seyan leşkeran vernîya ma girewt. Cayo ke ma şîyî xeylê xirab bî û weş nêbî. Bi desan reyan kontrol û cigêrayîş kerdî. Dimayê cigêrayîşan ma berdî odeyêk ke xeylê leşkerî tede bî. Na odeye de mi 40 deqe bi birayê xo reyde pêvînayîş kerd. Ma bi Kurdî qisey kerdî. Leşkeran vatî ‘şima bi Kurdî qisey bikerî ez do leşkeran rona kişta şima, ez do kelepulê qeydkerdişê vengî rona kişta şima’. Ma bi ziwanê xo Kurdî qisey kerd û ê zî kelepulê qeydkerdişê vengî ardî ronayî." 

 

Melîhaye qiseykerdişê xo yê peyênan de dîyar kerd ke tecrîd tena Îmraliyî de pê nîno serê heme şarê Kurdî de pê yeno û ganî tecrîd peynî bibo û problemî bêrî çareserkerdiş.