Oznûr Deger - Dîlan Babat

 

ANQARA - Hemşaredara Kopî Eylem Sarucaya ke qeyûm tayînê herinda aye ameybî kerdiş, da zanayîş ke sîyasetê qeyûm polîtîkayê tecrîdî ra xoser nîyo û vat: “Ganî şarê Tirkîya û Kurdistanî weçînayîşê herêmî de seba ke cewab bidê sîstemî, pîya têkoşîn bikerê. Wexto ke ma tesîrê ci bi komelî bikerê do komelêk demokratîke bêro awankerdiş.” 

 

Partîya Têduştî û Demokrasîyî yê Şaran (HEDEP) 11ê teşrîna peyêne de bi sloganê ‘Bi jin jiyan azadîye reyde ver bi îdarekarîyê herêmî’ Anqara de Konferansê Cinîyan ê Îdarekarîyê Herêmî yê Demokratîke pê arde. Konferans de temsîlkarîya têduştî, îdarekarîyê herêmê demokratîke, sîyasetê rayîrê hîrine û xeylê babetê bînî ameyî munaqaşakerdiş. Yew nuqtaya tewr muhîm ya ke konferans de ame munaqaşakerdiş zî tecrîdê serê Rayberê PKKyî Abdullah Ocalanî bî. Hemşaredara Kopî ya Muşî Eylem Sarucaya ke qeyûm tayînê herinda aye ame kerdiş derheqê tesîrê tecrîdî yê serê polîtîkayê qeyûmî ercnayîş kerd. 

 

 ‘Sîyasetê qeyûmî ra xoser nîyo’ 

 

Eyleme ard ziwan ke sîyasetê qeyûmî polîtîkayê tecrîdî ra xoser nîyo û wina vat: “Tecrîdê giran ê 25 serrî ke serê Abdullah Ocalanî de yeno rayîr ra berdiş serê heme komelî de tesîr viraşt o û sîyasetê qeyûmî ser de zî tesîr kerdo. Sîyasetê qeyûmî serê komelê demokratîke ya ke şarê kurdî waştêne awan bikero ame caardiş. Sîyasetê qeyûm demêk o pê yeno. Vera ziwan, kultur û komelê kurdî de no sîyaset ame rayîr ra berdiş. Serê awankerdişê sîstemê demokratîke de ame awankerdiş. Na rewşe zîhnîyetê serdet yê camêrdî ra cîya nîno dîyîş.”

 

 ‘Wazenê cîyayeyan bikerê yew tîp’ 

 

Eyleme sewbîna dewamê qiseykerdişê xo de ard ziwan ke tecrîdê serê Abdullah Ocalanî bi hawayêkê kêfî pê yeno û wina dewam kerd: “Heqê pêvînayîşê bi keye û avûkatan destê cira ameyo girewtiş û no sûcê merdimîye yo. Na polîtîka bi serran o yena rayîr ra berdiş. Leteyêk polîtîkayê tecrîdî zî sîyasetê qeyûmî yo. Ziwan, kultur yenê qedexekerdiş. Destkewtiş yenê çinîkerdiş. Senî ke serê Rayberê Şarê Kurdî de tecrîd pê yeno, sîyasetê qeyûmî zî serê şarî de pê ano. Şexsê şaredarîyan de wazenê her kesî bikerê yew tîp.”

 

 ‘Vera şarê Kurdî de darbe’ 

 

Eyleme ard ziwan ke sîstemê qeyûmî sey protîpê sîstemo ke dewlete şarî ser de ferz kena fînaya cuye û vat ke no vera şarê kurdî de darbe yo. Eyleme ercnayîşê xo wina dewam kerd: “Tena şarê kurdî nê heme şarê Tirkîya binê tecrîdî de yo. Vera nê tecrîdî de bi hawayêkê topyekun veng nêro vetiş do tecrîd hîna zêde gird bibo.”

 

 ‘Seba komelêk demokratîke têkoşînê yewbîyaye’ 

 

Eyleme qiseykerdişê xo yê peyênan de da zanayîş ke texrîbato ke bi sîyasetê rant û talanî ameyo kerdiş bi awankerdişê komelêk demokratîke eşkeno bêro çareserkerdiş û wina peynî kerd: “Bi perspektîfo ke Abdullah Ocalan dayo verê ma no eşkeno pê bêro. Seba komelêk demokratîke têkoşînê yewbîyaye ferz o. Ganî şarê Tirkîya û Kurdistanî pîya vera nê çîyî de vinderê û têkoşîn bikerê.”