AMED - Hemsereka Pêroyî ya DBPyî Çigdem Kiliçgun Uçare bale ant serê tecrîdê giran ê serê Rayberê PKKyî Abdullah Ocalanî û wina vat:"Birêz Ocalan wayîrê projeyê demokratîkbîyayîşî û çareserîya meseleya kurdî yo." 

 

Partîya Herêmê Demokratîke (DBP) 6ine Kongreyê xo yê Asayî 12ê Teşrîna Peyêne de Anqara de pê ard. Hemserekê pêroyî zî nê kongreyî de ameyî weçînayîş. Kongre de babetê tecrîdê giran ê serê Rayberê PKKyî Abdullah Ocalanî û têkoşînê vera tecrîdî ser de ame vindertiş. Hemsereka Pêroyî ya DBPyî Çîgdem Kiliçgun Uçare derheqê tecrîd, xebatê DBPyî yê prosesê newe û derheqê problemê welatî de qisey kerd. 

 

'Kurdan bi partîyê ke awan kerdî paştî dayî sîyasetê demokratîk' 

 

Çîgdeme ard ziwan ke çîyo ke sîyasetê Tirkîya dîyar keno yewperestîya serê sîyasetî ya û wina vat: “Ewro komel bi 3 çîyan reyde rî bi rî yo. Yew ci ra netewperwerîya dînamîk, yew ci ra dîndarî û cinsperestî yo. Nê tesîrê înan ê serê sîyasetî esto. Şarê kurd her tim vera înan de xoverdayîşê xo dewam kerdo. HEP ra heta ewro û ewro zî bi DBP û HEDEPî reyde dewam keno. Têkoşînêk sîyasî yê şarê kurdî yê winasî esto. Kurdan bi partîyê ke awan kerdî paştî dayî sîyasetê demokratîk." 

 

'Şarê kurdî waşt îqtîdar bibedelîyo’ 

 

Çîgdeme da zanayîş ke partîyê kurdan wayîrê temsîlkarîyêk xurt ê û wayîrê hêzê bedilnayîşê hemsengîya sîyasî ya Tirkîya yo û wina dewam kerd: “Partîyê sîyasî roja ke ameyî bedilnayîş ra nata para xo teda û mudaxaleya dewlete ra girewtî. Serranê 90î ra heta nika her tim partîyê ke kurdan awan kerdî, ameyî girewtiş. La kurdî qet nêvindertî. Ewro DBP yew hemkarê tewr xurt ê HEDEPî yo. Weçînayîşan de zî tabloyêk winasî vejîya raşte. Şarê kurdî waşt ke îqtîdar bibedelîyo. La rexneyê şarî yê seba partîye zî estbî. Coka ra zî ma eşkenê vajê ke tena partîya ke rexneyan girewt verê çiman HEDEP û hetê Kurdistanî de DBP bî. Coka ra zî ma rexneyan girewt verê çiman û ma do rayîrê newe zî serê esasê dîyîşê înan rexneyan de dewam bikerê.”

 

'Birêz Ocalan wayîrê projeyê demokratîkbîyayîşî û çareserîya meseleya kurd o' 

 

Çîgdeme da zanayîş ke Rayberê PKKyî Abdullah Ocalan wayîrê projeyê demokratîkbîyayîş û çareserîya meseleya kurd o û wina vat: “Tarîxê 100 serran ê komare de seba nê projeyî kesêk tu berpirsîyarî nêgirewt serê milê xo. Prosesêk dest pêkerd la vatî ma mutabakatê Dolmabahçeyî vist dolabê cemedî. Eke meseleya kurd çareser biba do dînamîkê ke na dewlete ser de ronişena yew bi yew birijê. AKP dî ke tena mend û şî çareserîya tîfaqî û bi MHPyî reyde bî yew."

 

'Ganî Birêz Ocalan azad bibo'

 

Çigdeme dîyar kerd ke semedê tecrîdî û çareserîya meseleya kurdî de kombîyayîş organîze kerdên û vat: "Konferans û kongreyê ma de hemverê polîtîkayê tecrîdî û polîtîkayê şerê taybetî de xetêke têkoşînî yê şarê kurdî estbî. Xeta têkoşînî erco muhîm Tirkîya de zêde kerd. Birêz Ocalanî waştişê nê şarî dî. Coka ganî Birêz Ocalan azad bibo."

 

Venga tewrbîyayîşê Rayîr ra şîyayîşê Azadî

 

Çigdeme dîyar kerd ke ganî Rayîr ra şîyayîşê Gemlikî yê 18ê Teşrîna Peyêne de bibo rayîr ra şîyayîşê Tirkîya û wina vat: "No rayîr ra şîyayîş bi waştişê şarê Kurdistanî vejîya werte. Ganî şarê Tirkîya zî semedê meseleya kurdî xo ver bida. Semedê cuyêka hempar û demokratîke ganî her kes waştişê şarê kurdî bigîro verê çiman. No tenê rayîr ra şîyayîşê şarê kurdî nîyo, pêro şaran o. Coka ma venga her kesî kenê.”

 

'Ganî ma çalakîyanê xo xurt bikerê'

 

Çigdeme da zanayîş ke Tirkîya bi nêrêxistinbîyayîşê komelî yena jehrîkerdiş û wina  qedêna: "Wazenê komelî bê rêxistin verdê. Labelê komelê bê rêxistin bimano, hêzê xo yê muhakemeyî zî vînî keno. Wazenê bi dîn, cinsperestî, netewperestî nê komelî jehrî bikerê. Îqtidaro bîyaye serê Kurdistanî de wazeno Tirkîya îdare bikero. Coka zî lazimîya ma xebatê ke komel destkewtişê xo bi ercno esto. Îqtidar semedo ke asteng bikero hemverê vengê kuçeyan vejîyeno zext zêde keno. Coka zî ganî ma çalakîyanê xo xurt bikerê.