AMED - Endama Meclîsê Ciwanan a HEDEPî Senem Erîşe dîyar kerd ke do 25ê Teşrîna Peyêne de vera sîstemê serdest ê camêrdî de raşteyan de bê û vat: “Ma 25ê Teşrîna Peyêne de ciwanan, cinîyan, cinîyê ciwane dawetê xoverdayîşî kenê.”

 

Bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ya Mîyanneteweyî heme dinya de her serre bi girseyî çalakî û aktîvîteyî yê yenê û bajarê Kurdistan de zî bi wesîleya na roje vera şîdetê camêrd-dewlete de têkoşîn yeno berzkerdiş. Cinîyê ciwan ê ke serkêşîya têkoşînê xoser kenê hedefê îqtîdarî de yê. Endama Meclîsê Ciwanan a Partîya Têduşte û Demokrasîye ya Şaran (HEDEP) Senem Erîşe bi wesîleya 25ê Teşrîna Peyêne problemê ke cinîyê ciwan ciwîyenê, hedefgirewtişê cinîyê ciwan û xeta têkoşînî ercnaye. 

 

‘Kesê ke şorişê Rojawanî awan kerd cinî yê’ 

 

Seneme da zanayîş ke bi problemê hegemonîkî ke cehd keno cinîyan fîzîkî û îdeolojîk çinî bikero reyde rî bi rî yê û wina dewam kerd: “Sere de ewnîyayîşê îdeolojîk yê ke bi cinîyê ciwanan yenê ferzkerdiş ganî bêrê şikitiş û bi no hawa gamêk bêro eştiş. Kurdistan de cinî wayîrê potansîyelêk ke eşkena cuyêka bi ercaye awan bikera ya. Coka ra sîstemê serdest ê camêrdî hêriş keno. Tirkîya û Kurdistan de bi haletê sey tacîz, destdergê û qetilkerdişî qirkerdişê cinîyan yeno ciwîyayîş. Qanûn cinîyan nêpawenê. Peymana Stenbolî ke heqê cinîyan pawitêne fesh kerdî. Vîşêrê înan Tirkîya de cinî mîyanê xoverdayîşêk gird de ya. Ewro ma eşkenê vajê ke awankarê şorişê Kobanê, şorişê Rojawanî cinî bî.” 

 

Cinîyê kurd hedef yenê girewtiş!

 

Seneme ard ziwan ke şorişê Rojawanî de serkêşîya cinîyan muhîm o û vat: “Çîyo ke Şorişê Rojawanî pê ard felsefeya ‘jin jiyan azadî’ bî. Na felsefe tena seba cinîyanê kurd nê seba heme cinîyanê dinya bî hêvî. Ma no adetê xoverdayîşî sey mîras gênê û vera nê de cuya alternatîf awan kenê. Vera heqê cinîyan de, vera cinîyan de Tirkîya û Kurdistan de şîdetêk zaf hetin esto. Kurdistan de camêrd-dewlete bi hawayêkê cîya verê xo dano cinîyan. Ma nê çîyî çarçeweya şerê taybetî de gênê dest. Bi taybetî cinîyê kurdî hedef yenê girewtiş.”

 

‘Ma do teslîmîyetê îdeolojîk bişiknî’ 

 

Seneme dîyar kerd ke dewlete wazena şarê kurdî çinî bikera û na babete de zî ercnayîş kerd: “Bi qirkerdiş, qirkerdişan nêeşkenê şarê kurdî biqedênê û coka ra zî hêrişê vîrê şarî kenê. Cehd kenê ke rayîr ra bivejnê vîr çinî bikerê. Wexto ke nê çîyî kenê zî tewr zêde hêrişê cinîyan kenê. Kurdistan de tîryak, fuhuş bi cinîyan yeno ferzkerdiş. Sîstemê serdest wazeno cinîya goreyê xo awan bikero. La ma teslîmîyetê îdeolojîk ke bi cinîyan yeno ferzkerdiş qebûl nêkenê.” 

 

‘Kampanyaya ma bî hêvî’ 

 

Seneme dewamê qiseykerdişê xo de bale ant serê xeta têkoşînî ya cinîyan ya sîstemê serdest ê camêrdî û wina vat: “No têkoşîn têkoşînê ‘awankerdişê komelêk azad o’. Çarçeweya kampanyaya ma ya ‘vera şerê taybet de têkoşînêk bi heybet’ ma xo resna xeylê cinîyê ciwan. Bi atoleyeyê cinîyan, bi seyranan, bi maçê futbolî û xeylê bernameyê bînî ma bi cinîyan reyde ameyî têhet. Kampanyaya ma na hete de bî hêvî.”

 

‘Ma venga xoverdayîşî bi cinîyan kenê’ 

 

Seneme peynîya qiseykerdişê xo de bi wesîleya nizdîbîyayîşê 25ê Teşrîna Peyêne venga têkoşînî bi cinîyan kerd û wina peynî ard: “25ê Teşrîna Peyêne seba cinîyan muhîm a. her serre cinî raşteyan de yê. Na roje seba waştişê cinîyan û berzkerdişî xeylê muhîm a. 25ê Teşrîna Peyêne roja serewedarnayîşî ya. Coka ra ma heme ciwanan, cinî û cinîyê ciwanan dawetê xoverdayîşî kenê.”