STENBOL - Temsîlkara rêxistinê komelê sivîl û sîyasetmedaran venga tewrbîyayîşê 'Rayîr ra Şîyayîşê Azadîye’ ke do 19ê Teşrîna Peyêne de bêro viraştiş, kerdî û wina vatî: “Azadîya fîzîkî ya Abdullah Ocalanî şert o. Ganî şar Rayberê xo ra xebere bigêro. Eke Rayberê şarê kurdî azad bibo do cinî, ciwan û şar zî azad bibî. Seba ke no bêeadaletî û bêhuqûqî raşte ra wedarîyo ma venga şarî ya seba rayîr ra şîyayîşê Gemlîkî kenê." 

 

33 aşmî yo Rayberê PKKyî Abdullah Ocalanî ra tu xeberêke nîna girewtiş. Bi bahaneyê "cezaya dîsîplînî" muracatê avûkatan yenê redkerdiş. Seba azadîya fîzîkî ya Abdullah Ocalanî Kurdistan û Ewropa de têkoşînêk gird yeno dayîş. Çarçeweya nê waştişî de ver bi Gemlîkî ra bi nameyê 'Rayîr ra Şîyayîşê Azadîye’ rayîr ra şîyayîşêk yeno organîzekerdiş. Kurdistan de 18ê Teşrîna Peyêne de, Stenbol de zî 19ê Teşrîna Peyêne de rayîr ra şîyayîş do bêro destpêkerdiş. Xebatê seba rayîr ra şîyayîşî dewam kenê. 

 

Hemsereka Komeleya Paştîdayîş û Hetkarîya Kesê ke Merdimê Xo Vînî Kerdî Reyde ya Anadoluye (ANYAKAY-DER) Evîn Genç û Hemsereka verêne ya Partîya Têduşte û Demokrasîyî ya Şaran (HEDEP) a Stenbolî Îlknur Bîrole derheqê 'Rayîr ra Şîyayîşê Azadîye’ de qisey kerdî û venga tewrbîyayîşê kerdî. 

 

'33 aşmî yo xebere nîna girewtiş’ 

 

Evîn Gençe dîyar kerd ke 33 aşmî yo xebere Rayberê PKKyî Abdullah Ocalanî ra nîna girewtiş û wina vat: “Na babete bi taybetî ma cinîyan kena mîyanê şikan û ma hîsgêr kena. No çî nîşaneyê xorîbîyayîşê şerê Rojhelatê Mîyanênî yo. Hem şer û hem zî krîzê Tirkîya her ke şinê xorî benê. Sebebê nê çîyî zî polîtîkayê tecrîdî yo. Wazenê heme destkewtişan raşte ra wedarnê. Ma xeberenêgirewtişê mutlaq qebul nêkenê. Ganî Rayberê Şarê Kurdî Abdullah Ocalanî ra xeber bêra girewtiş. Nê semedî ra ma 19ê Teşrîna Peyêne de Stenbol de 'Rayîr ra Şîyayîşê Azadîye’ pê anê. Ma venga şarê xo kenê ke tewrê rayîr ra şîyayîşî bibê." 

 

'Azadîya Ocalanî azadîya şaran o’ 

 

Evîne da zanayîş ke 'Rayîr ra Şîyayîşê Azadîye’ tena seba Şarê Kurdî nê seba Tirkîya û Rojawanî zî pê anê û wina ercnayîş kerd: “Nika Rojawan û Tirkîya de prosesêk xetemîyaye esto. Nê prosesî de tena Şarê Kurd nê Şarê Tirk zî probleman ciwîyeno. Coka ra zî ganî heme şarê ke Tirkîya de ciwîyenê tewrê 'Rayîr ra Şîyayîşê Azadîye’ bibê. Lazimîya ma bi girewtişê nefesî est a û amacê rayîr ra şîyayîşî zî no yo. Ganî azadîya fîzîkî ya Abdullah Ocalanî pê bêro. Çike azadîya ci azadîya şaran o. No rayîr ra şîyayîş seba ma xeylê ercaye yo. Eke Rayberê Şarê Kurdî azad bibo cinî, ciwan û heme şar do azad biciwîyo. 19ê Teşrîna Peyêne rojêk muhîm a. Ez reyna venga heme şaran kena ke tewrê rayîr ra şîyayîşî bibê.” 

 

'Ganî muzakereya demokratîke pê bêra' 

Hemsereka verêne ya HEDEPyî ya Stenbolî Îlknur Bîrole zî da zanayîş ke Tirkîya de problemê yewine çaresernêkerdişê problemê kurdî yo û wina vat: "Heta ke problemê kurd nêro çareserkerdiş do şîdet, destdergî dewam bikerê. Ma bi desan reyan ard ziwan ke sîyasetê çaresernêkerdişê problemê kurdî ganî hetê dewlete ra bêro çareserkerdiş. Muzakereya demokratîke ganî pê bêra. Caardişê rejîmî sîstemê tecrîdî yê Îmraliyî vera pê yeno. Xeber nêgirewtişê Îmraliyî, raybazêk taybet o û nika vilayê pêroyê komelî bîyo.” 

 

'Vera tecrîdî de tewrê rayîr ra şîyayîşî bibê’ 

 

Îlknure dîyar kerd ke vera feqîrî û polîtîkayê binpaykerdişî de ganî tecrîd raşte ra bêro wedaritiş û wina peynî ard: “Ganî ma komelî rê qala sebebê wedaritişê tecrîdî bikerê. Ganî ma tîya de vera aqilê dewlete de têkoşîn bikerê. Bi vengêk gird ez venga hêzê demokratîke kena ke rayîr ra şîyayîşê ver bi Îmraliyî ke do 19ê Teşrîna Peyêne de pê bêro muhîm o. seba rijnayîşê rejîmê tecrîdî ganî ma hêzêk hempare bimojnê û ez venga tewrbîyayîşî her kesî kena.”