ŞIRNEX - Roniştişê dewaya Hasan Karaslan ke cinîya ke ey reyde zewicnaye bî,  Leyla Karaaslan û 3 kênayanê xo qetil kerd, do siba bêro kerdiş. Aktîvîsta TJAyî Guler Tûnçe venga pêro cinîyan kerd ke beşdarê roniştişî bibê.

 

24ê tebaxa 2022yîne de Taxa Yenî ya girêdayê qezaya Hezexî ya Şirnexî de Hasan Karaaslan cinîya ke ci reyde zewicnaye bi Leyla Karaaslan (40) û kênaya xo ya Derya (17), Melek (16) û Şerîfe (13) wexto ke hewn de bî, qetil kerd. Hasan Karaaslan dima ra bi îdiayê "Bi qestî cinî û tutanê xo kişto" tepişya û şirawitî Zîndanê Tîpê Tyê Şirnexî. Derheqê Hasanî de bi îdiayê "Bi zanebîyayîş cinî û tutanê xo kişto" îdianame ame amadekerdiş. Bi serran şîdetê sîstematîk Leyla Karaslan rê ame kerdiş. Roniştişê dewaya ke Hasan do bêro muhakemekerdiş do siba (17ê teşrîna peyêne de) 2yîn Dadgeha Cezaya Giran ya Cizîre bêro viraştiş.

 

Venga semedê wayîrvejîyayîşê dewa

 

Aktîvîsta Têgêrayîşê Cinîyanê Azadan (TJA) Guler Tûnçe Ajansê Mezopotamyaye (MA) rê qisey kerd û vat: “Semedê dewaya Leyla Karaaslan û kênayê aye yê ke netîceyê politîkayê taybetî de ameyî qetilkerdiş, venga ma pêro rêxistin, dezgeh û temsîlkarê cinîyan ra esto ke 17ê teşrîna peyêne de ma wazenê pêro kesî beşdarê dewa bibê. Semedo ke dewayêke  bi adilane pê bêro, ganî ke ma uca de cayê xo bigîrê. Semedo ke 25ê teşrîna peyêne Roja Têkoşînê hemverê Şîdetê serê Cinî yê Mîyanneteweyî yo, ma bibê vengê edaletî yê cinîyan.”