Elfazî Toral

 

STENBOL - Aktîvîsta TJAye Tuba Ulu Yagişliye dîyar kerd ke çarçeweya kampanyaye de tax bi taxe xebatan rayîr ra benê û seba azadîya Abdullah Ocalanî têkoşîn û rêxistinbîyayîşî gird kenê. Tuba vat, çarçeweya xebatan de 25ê Teşrîna Peyêne de venga paştîdayîş û rêxistinbîyayîşî bi heme cinîyan kenê. 

 

Têgêrayîşê Cinîyanê Azade (TJA) 19ê êlule de Şirnex de bi sloganê ‘Bi Jin Jiyan Azadî Reyde Ver Bi Azadîye ra’ startê kampanyaya newe da. Kampanya do heta 8ê Adare Roja Cinîyanê Dinya dewam bikera. Yew babetê yewine yê kampanyaye ra tecrîdê serê Rayberê PKKyî Abdullah Ocalanî bî. Çarçeweya kampanyaye de xebatê bajaran dewam kenê. 

 

Aktîvîstê TJAye ver bi 25ê Teşrîna Peyêne Roja Têkoşînê Vera Şîdetî yê Serê Cinîye yê Mîyanneteweyî ra çarçeweya kampanyaya xo de Kurdistan û Tirkîya de xebatan rayîr ra benê. Cinîyan hewteyê yewine yê aşma teşrîna peyêne de atolye pê ardî û tecrîd, babetê cinîyan, têkoşînî ercnayî. Stenbol, Bursa, Tekîrdag û xeylê bajarê Marmaraye de bernameyê di rojan pê ardî. Stenbol de zî qezayê Bagcilar, Esenler, Umranîye de atolye pê ameyî û atolyeyan de azadîya Rayberê PKKyî Abdullah Ocalanî vejîya aver. 

 

Aktîvîsta TJAye Tuba Ulu Yagişliye derheqê babete de JINNESî rê qisey kerd.

 

Tax bi taxe bi cinîyan reyde yenê têhet 

 

Tuba da zanayîş ke sere de cinîyê kedkar zafane cinîyî vera probleman de têkoşîn kenê û prosesê peynî de cinî seba polîtîkayê şerî îfşa bikerê her bajarî de xebatan rayîr ra bena, taxe û qezayan de bi cinîyan reyde pêvînayîşan pê ana. Tuba vat: “Ma babeta têkoşînî de ma eşkenê se bikerê û vera hêrişan de fehmê hemverê cinîye de eşkenê se bikerê munaqaşa kerd. Ma pawitişê cewherî munaqaşa kerd. Ma yewbînan ra hêz girewt.” 

 

Bi cinîyê mexdurê erdlerzî reyde paştîdayîş awan kerd 

 

Tubaye ard ziwan ke bi cinîyê herêma erdlerzî reyde tora paştîdayîşî awan kerdî û vat: “Erdlerz de bi hezaran kesan dinyaya xo bedilna. Şar o wext terkê mergî ame kerdiş. Ma cinî o wext herême de bî. Temamê serrî de hewl da birînanê înan bipişnê. Hema zî ma dewam kenê. Roja ewile de ma kişta mexduranê erdlerz de bê.”

 

Îqtîdar cinîyan ra terseno

 

Tuba dîyar kerd dimayê ke cinîya kurde Jîna Emînî Îran de hetê polîsê ahlaqî ra ameye qetilkerdiş, xoverdayîş dest pêkerd û bi felsefeya ‘jin jiyan azadî’ pîl bîyo. Tuba vat, no semedê înan xeylêk muhîm o û wina vat: “Şexsê Jîna Emînî de ma hewl da ma bibê vengê pêro cinîyan. Ma paştdayîşê cinîyan awan kerd. Bi hêzê ke ma cinîyan ra girewt ma paştdayîş awan kerd. Bi taybetî nê prosesî de îqtîdarî cinîyan ra tersayî.” 

 

Venga têkoşînî

 

Tuba peynîya qiseykerdişê xo de nê ercnayîşî kerd “Polîtîkayê şerî tewr zêde tesîr cinîyan rê kerd. Nê prosesî de cinî xeylêk tesîr bîyî. Tecrîd, tesîr serê pêro hetan de kerdo. Ma do hemverê nê hêrişan de goreyê ruhê seserra 21î xebatanê xo bikerê. Jin jiyan azadî semedê pêro cinîyê dinya bi îlham. Çarçewaya kampanyaye de ma tax bi taxe xebatan kenê û semedê azadîya Abdullah Ocalanî têkoşîn û rêxistinbîyayîş pîl kenê. Çarçewaya xebatanê 25ê Teşrîna Peyêne de ma venga paştdayîş û rêxistinbîyayîşî pêro cinîyan rê kenê.”