Dîlan Babat - Oznûr Değer

 

ANQARA - Endama Heyetê Merkezê Rayîrberîya Herêmî ya Demokratîke Oznur Evîne vat ke seba weçînayîşê herêmî raşteyan de xebata fîzîbîlîte pê anê û ard ziwan ke xebata raşteyan de bi cinîyan reyde fehmê ‘ez zî eşkena rayîr ra biba’ vejîya raşte. Oznure sewbîna dîyar kerd ke hedefê înan no yo ke dezgehê ke ameyî girewtiş û dewrê tarîkatan ameyî kerdiş newe ra bigîrê. 

 

Partîya Têdûştîye û Demokrasîyî ya Şaran (HEDEP) bi sloganê ‘Bi Jin Jiyan Azadî Reyde Ver Bi Rayîrberîya Herêmî Yê Azade ra!’ 12ê Teşrîna Peyêne de Anqara de Konferansê cinîyan ê Rayîrberîyê Herêmê Demokratîke awanîya Balgatî de pê ard. Konferans ra ver Kurdistan de atolye pê ameyî û serê pirsê ‘cinî şaredarêk senî wazenê’ xebatê fîzîbîlîte pê ameyî. 

 

Endama Heyetê Merkezê Rayîrberîya Herêmî ya Demokratîke Oznur Evîne derheqê xebatan û sernameyê ke konferans de vejîyayî aver de qisey kerd.

 

‘Ma qerarê newe girewtî’ 

 

Oznure dîyar kerd ke cinîyan xebatê fîzîbîlîteyî de qala fehmê cinî eşkena şaredarîye de ca bigêra kerdî û vatî ke no baş nîno ca û xorexnedayîşê xo kerdî. Oznure wina vat: “Şaredarîyê komelkî û şaredarîyê cinîyan esas gênê, ame dîyîş ke xîtabê xeylê hetanê komelî kenê û di mebenê cinîyan de zî vatişê ‘ez zî eşkena şaredarîye rayîr ra biba’ vejîyayo raşte. Şaredarîya cinî, şaredarîyêk ke bi polîtîkayê cinîyan yeno rayîr ra berdiş ya. Ma hewl danê sîstemê fermuarî her hetî ra pê bîyarê. Seba têduştîya temsîlkarîye ma qerarê neweyî girewt.”

 

‘Kome projeyî awan kerde’ 

 

Oznure sewbîna da zanayîş ke ê hewl danê şaredarîya temsîlkarîya têduştî pê bîyarê la bi tayînkerdişê qeyûman reyde no raşte ra ameyo wedaritiş û raşteyê ke qeyûman texrîb kerdî komê projeyan awan kerdî. Oznure nê çîyan vat: “Xeylê şaredarîyan de texrîbat pê ameyî. Dezgehê ma ameyî girewtiş û dewrê tarîkatan ameyî kerdiş. Yan zî açarîyayî keyeyê şînî. Camêrdan tayînê mudirîya polîtîkayanê cinîyan kerdî. La hedefê ma no yo ke ma dezgehan tepîya bigîrê.” 

 

‘Ma qerardar î’ 

 

Oznure qiseykerdişê xo yê peyênan de bale ant serê polîtîkayê şerê taybet yê ke Kurdistan de yenê rayîr ra berdiş û wina peynî kerd: “Heme raşteyê ke cinî û ciwanan xo tede aver berdêne bi destê qeyûman ameyî çinîkerdiş. Heme raşte ameyî girewtiş. Polîtîkayê ke ciwanan rayîr ra vejenê yenê rayîr ra berdiş. Cinîyê ciwan fînîyenê fuhuşî û tîryak yeno ferzkerdiş. La vera înan de ma bi qerardarê ke têkoşînê xo berz bikerê û rayîr ra berê. Ma do polîtîkayê şerê taybet teşhîr bikerê. Ma bi qeradarî ke bajarê xo bi şarê xo reyde rayîr ra berê.”