Rozerîn Gultekîn

 

AMED - Hemsereka MEBYA-DERî ya Amedî Semîre Akkoçe derheqê Rayîr ra Şîyayîşê Gemlîkî ke bi sloganê ‘Rayîr ra Şîyayîşê Azadîye’ pê bêro de qisey kerd û wina veng kerd: “Ez venga heme cinî û ciwanan kena. Ma tecrîdê serê serekê xo bişikinê û azadîya ci pê bîyarê.” 

 

33 aşmî yo tu xeberêke Rayberê PKKyî Abdullah Ocalanî ra nîna girewtiş û muracatê keye û avûkatan zî bi bahaneyan yenê redkerdiş. Bi serkêşîya Têgêrayîşê Cinîyanê Azade (TJA), Komeleya Paştîdayîşê Keyeyê Tepişteyê Dergûşa Şaristanîyan de (MEBYA-DER), Komeleya Hetkarîya Keye û Tepişteyan (TUHAY-DER) do 18ê teşrîna peyêne de bi waştişê wedaritişê tecrîdê serê Rayberê PKKyî Abdullah Ocalanî qezaya Gemlîkî ya Bursaye de ‘Rayîr ra Şîyayîşê Azadîye’ pê bêro. Hemsereka Komeleya Paştîdayîşê Keyeyê Tepişteyê Dergûşa Şaristanîyan de (MEBYA-DER) ya Amedî Semîre Akkoçe derheqê rayîr ra şîyayîşî de qisey kerd. 

 

‘Serekê ma azad bo ma do zî azad bê’ 

 

Semîre da zanayîş ke tecrîdê serê Abdullah Ocalanî heme hetê komelî ser de tesîr viraşto û wina dewam kerd: “33 aşmî yo tu xeberêke ci ra nîna girewtiş. Nêeşkeno bi keye û avûkatanê xo reyde pêvînayîş bikero. Nê semedî ra çi destê ma ra bêro ganî ma bikerê. Ganî ma nê tecrîdî bişikinê. Ma ganî wayîrê serekê xo bivejê. Ganî heme dinya wirzo payan ser. Ganî şarê ma wirzo payan ser. Şarê ma zî binê tecrîdî de yo. 25 serrî yo serekê ma tepişte yo. 33 aşmî yo ci ra ti xeberêke nîna girewtiş. No nîno qebulkerdiş." 

 

‘Ma 18ê Teşrîna Peyêne de rayîra ra şinê Gemlîk’ 

 

Semîre derheqê çalakîya ke seba azadîya fîzîkî ya Abdullah Ocalan xeylê welatan de dîyaya destpêkerdiş de qisey kerd û wina ercnayîşê xo peynî kerd: “Nê xebatan ra yew rojanê verênan de Amed de dîya destpêkerdiş. No zî ‘Nika ra ver bi azadîye ra venga somut’ bî. Sewbîna dinya de na xebate yena rayîr ra berdiş. Sebebê nê çîyî zî no yo ke Abdullah Ocalan heqdar o. Ma zî çarçeweya deklerasyonî de xebata xo rayîr ra benê. 18ê Teşrîna Peyêne de ma çar hetê Kurdistanî ra ver bi Gemlîkî rayîr ra şinê. Ma her çîyî dayo çiman ver. Ma nêtersenê. Ma do heta kam cayî bitersê. Ma pîya rayîr ra şinê û tecrîdî bişikinê.”