Dîlan Babat - Oznûr Deger 

 

ANQARA - Endama Heyetê Rayîrberîya Herêmî Rozerîn Îldane da zanayîş ke hedefê esil azadîya fîzîkî ya Rayberê PKKyî Abdullah Ocalanî yo û wina vat: “Weçînayîşê rayîrberîyê herêmî nizdî beno. Ma do weçînayîşê rayîrberîyê herêmî de heme şaredarîyê Kurdistanî bigîrê û uca de serê esasê rayîrê hîrine sîyaset rayîr ra berê.” 

 

Konferansê Cinîyan ê Rayrîberîya Herêmî yê Demokratîke yê Partîya Têduştî û Demokrasîye ya Şaran (HEDEP) 11ê Teşrîna Peyêne de Anqara de ame viraştiş. Konferans, bi sloganê “Bi jin, jiyan, azadî reyde ver bi rayîrberîyê herêmî yê azade ra” ame viraştiş. Konferans şexsê Hevrîn Xelef, Yûsra Derwêş û Kader Ortakayaye yê ke Bakur û Rojhelatê Sûrîyeye de ameyî qetilkerdiş de dîyarîyê heme cinîyanê têkoşere ame kerdiş. Konferans de cinîyan bale antî tecrîdê serê Rayberê PKKyî Abdullah Ocalanî û rayîrê hîrine ser. 

 

Endama Heyetê Rayîrberîya Herêmî ya HEDEPî Rozerîn Îldane derheqê konferans û komxebatê ke pê ardî de ercnayîş kerd. 

 

Lîberalîzm, şerê taybet, rayîrê hîrine 

 

Rozerîne ard ziwan ke înan di serrî verê cu konferansê cinîyan viraştî û qerar girewtî û bi înan qeraran prosesêk newe dayî destpêkerdiş û wina vat: “Dimayê weçînayîşê pêroyî seba weçînayîşê herêmî zî start ame dayîş. Xebatê ma bi atolye û xebatê cinîyan dest pêkerd. Dimayê serra 2019î xespkerdişê qeyûman hêrişê girdî vera destkewtişê cinîyan de virazîya. Ma înan caardişan ra dima Silopî de komxebata di rojan a cinîyan viraşt. Dimayê munaqaşayê di rojan ma çar herêman de atolye pê ard. Babetê ke ma dayî xo ver wina bî; lîberalîz, şerê taybet, sîyasetê rayîrê hîrine, zîhnîyetê camêrd ê serdest û tifaq. Amed, Serhad, Botan û Tirkîya de xebatê me yê komxebatan virazîya. Ma serê tesîrê rêxistinbîyayîşî û pêşnîyarê çareserîyan zî vindertî.”

 

'Îradeyê rêxistinbîyaye hîna zêde vejîya raşte'

 

Rozerîne dîyar kerd ke konferans û komxebatan de îradeyê rêxistinbîyayîşê hîna zêde yê cinîyan vejîya raşte û wina dewam kerd: “Eynî munaqaşayan de ame vatiş ke lazimî hîna zêde rêxistinbîyayîşî rê esta. Sewbîna zî ma serê babetê; weşî, ekolojî, şîdetê serê cinîyan munaqaşa da rayîr ra berdiş. Do xebatê ma heta weçînayîşê herêmî dewam bikerê. " 

 

'Do sîyasetê rayîrê hîrine şaran rê bêro akerdiş’

 

Rozerîne dîyar kerd ke hedefê cinîyan ê prosesê vernîya ma de awankerdişê komelî yo û wina dewam kerd: “Problemê ma yê bingeyîn ê Kurdistan û Tirkîya problemê awankerdişê komelî yo. Ganî nê problemî peynî bibê û seba ke ma hîna zêde bi hêz û bi rêxistinkerde bê ganî ma awankerdişê komelî hîna xurt bikerê. Seba ke ma weçînayîşê rayîrberîya herêmî de ser bikewê ma do xebatê xo dewam bikerê. Ma do Kurdistan û Tirkîya de sîyasetê rayîrê hîrine şaran rê akerê. Vera şîdetê serê cinîyan de ma do hîna zêde tora cinîyan awan bikerê. Sewbîna ma do heta peynî sîstemê hemserekatîye bipawê.”

 

'Ma do Birêz Ocalanî azad bikerê' 

 

Rozerîne da zanayîş ke sîstemê hemserekatîye tena cinîyan eleqedar nêkeno û wina vat: “Wexto ke nê babetan munaqaşa kenê eynî wext de ma vînenê ke Kurdistan û Tirkîya de şer aver keweno. Bi taybetî prosesêk ke teda aver şina esto. Polîtîkayê şerê taybet û hêrişê serê Rojawanî dewam kenê. No sîstemê tecrîdî heme komelî de yeno vilakerdiş. No tecrîd tena serê şexsîyet de nê serê heme komelî de esto. Ma êdî tena girewtişê xebere nê ma azadîya fîzîkî ya Abdullah Ocalanî wazenê. Ma do Birêz Ocalanî azad bikerê. Ma do rêxistinbîyayîşê xo gird bikerê û têkoşînê xo dewam bikerê.”