Mîdye Miqted

 

HELEB - Cinîyê ke tewrê 4ine Festîvala Şehîd Stêrvane ya Helebî bîyî, dîyar kerdî ke amacê înan no yo ke bi festîvalê winasîyan hîna zêde kulturê cinîyanê ciwanan xurt bibo û wina vatî: “Do bi paştîdayîşê hunerî, cinîyê ciwanî faşîzmî çinî bikerê.” 

 

4ine Festîvala Şehîd Stêrvane ya Helebî bi sloganê ‘Jin Jiyan Azadî’ Taxê Şêxmeqsûd û Eşrefiyê yê bajarê Helebî de ameye viraştiş. Festîvale di rojan dewam kerd. Komê deyîran, govend û 8 tîmê sporî tewrê festîvale bîyî. Endama Koordînasyonê Yewîya Cinîyê Ciwane ya Bakur Rojhelatê Sûrîyeye Hêva Bekire û Rayîrberîya Têgêrayîşê Ciwanê Şorişgêr a Herêma Efrînî Zelal Ebdoye derheqê festîvale de qisey kerdî. 

 

'Cinîyê ciwanî cayê xo festîvale de girewtî’ 

 

Endama Koordînasyonê Yewîya Cinîyê Ciwane ya Bakur Rojhelatê Sûrîyeye Hêva Bekire ajansê ma rê derheqê festîvale de ercnayîş kerd û wina vat: “Ma sey Yewîya Cinîyê Ciwanan a Herêma Heleb û Şehbaye 4ine Festîvala Şehîd Stêrvane pê ard. No çî seba ma şansêk girdo ke rewşêk winasî de ma eşkayî festîvala xo pê bîyarê. Cinîyê ciwanî cayê xo festîvale de girewtî. Rengê cinîye vejîya aver. No zî seba ma şansêk o.”

 

'Amacê ma no yo ke hîna zêde kulturê cinîyê ciwanî xurt bibo' 

 

Peynîya qiseykerdişê xo de Hêvaye festîvala Rayberê PKKyî Abdullah Ocalanî pîroz kerd û wina vat: “Ma festîvala xo ya wayîrê felsefeya azadîye bi Rayberê Şarê Kurdî Abdullah Ocalan û keyeyê şehîd Stêrvane pîroz kenê. Amancê ma no yo ke ma hunerê cinîyan hetê kultur, spor û hunerî de aver berê û hîna zêde kulturê cinîyanê ciwanan xurt bikerê. Ma xeylê kêfweşê ke hûmarêka baş ê cinîyê ciwanî tewrê festîvale bîyî.”

 

'Faşîzim timî ciwanan keno hedefê xo' 

 

Eynî wext de zî Rayîrberîya Têgêrayîşê Ciwanê Şorişgêr ê Herêma Efrînî Zelal Ebdoye zî ajansê ma rê qala amancê viraştişê festîvale kerd û wina vat: “Festîvala ma di rojan dewam kerd. Roja yewine a sporî û roja yewine ya hunerî û kulturî bî. Semedo ke faşîzm hêrişê dînamîkê komelî keno, coka ra zî ganî ciwan hîna bi hêz bibê. Çike no dînamîkê ciwanan o. Seba ke no dînamîzm raşte ra bêro wedaritiş verê xo danê ciwanan û serkêşê cinîyan hedef gênê. Bi înan reyde wazenê bi cinîyê ciwanan tepîya game bidê eştiş.”

 

'Yê ke barê nê şorişê wedaritî cinîyê ciwan ê’

 

Qiseykerdişê xo yê peyênan de Zelale dîyar kerd ke têkoşînê cinîya ciwane do heta çinîkerdişê faşîzmî dewam bikero û wina peynî ard: “Îqtîdar timî wazeno bi faşîzmî wezîfe û rolê cinîyan çinî bikero. Bi taybetî cinîyê ciwanî yê ke ewro barê no şorişê wedaritî serê milê xo, benê hedef. Yew nimuneyê nê çîyî zî hedefgirewtişê şehîd Vejîne ya. Cinîyê ciwan yê ke Bakur û Rojhelatê Sûrîyeye de xebate kenê, yenê hedefgirewtiş. Ma şexsîyetê şehîd Vejîne de pêroyê şehîdanê dewaya azadîye yad kenê û seba wayîrvejîyayîşê ked û têkoşînê şehîdanê xo ma do bê maben xebeta xo bidê dewamkerdiş. Her çend ke dişmen biwazo îradeyê ma binpay bikero zî ma do her tim têkoşînê xo gird bikerê.”