Mîdye Miqted

 

HELEB - Cinîyê taxa Şêxmeqsûdî derheqê serrgêra veşnayîşê Sînamaya Amûdî de reaksîyonê xo mojnayî û wina vatî: "Rêjîmê Baasî her qirkerdiş û qetîlam serê şarê kurdî de kerdêne la qirkerdişê Sînemaya Amudî bi hawayê eşkera pê ame û ma ewro bi sîstemê Xoserîya Demokratîke ke ma awan kerd, cewab danê nê rejîmî. 

 

13 Teşrîna Peyêne 1960 de 283 tutê kurdî ke şîbî sînemaya qezaya Amûdî ya Qamişloyî, netîceyê şewatî de dinyaya xo bedelnayî. Heta nika sebebê nê şewatî nêameyo eşkerakerdiş labelê pêro nîşanî eşkere kenê ke no qirkerdiş plankerde bîyo. Semedê paştdayîşê xoverdayîşê Cezayîrî fîlmêk bi nameyê “Tawana Nîmeyê Şewe” pêşkêşê tutanê Amûdê amebi kerdiş. Salona sînemaye de ke tenê qîmê 200 tutan kerdêne, dorê 500  tutê kurdî amebî bicakerdiş. Wexto ke tutî fîlm temaşe kenê, sînemayê de şewat vejîyeno. La semedo ke hêzê rejîmê Sûrîye demê şewatî de berê sînema anêkenê, 283 tutî netîceyê şewatî de dinyaya xo bedelnayî. Pêwa hedîseya xidar ke qewimya, derheqê kerdoxan de tu cipersayîşêk zî nêameyo destpêkerdiş. Şewatê Sînemaya Amûdî semedê tarîxê kurdan de hedîseyêke sîya ke nîna xovîrrakerdiş a.

 

Endama PYDyî ya taxa Şêxmeqsûdî Zeynep Elî û endama Meclisê Taxa Cengîzî yê Helebî derheqê qirkerdişî de ajansê ma rê qisey kerd.

 

Tutê bê gunayî ameyî veşnayîş

 

Endama Partîya yewîya Demokratîke (PYD) Zeyneb Elî destpêkê qiseykerdişê xo de hedîse şermezar kerd û vat, "Netîceyê nê şewatî de tutê bê sûc û guna ameyî veşnayîş. Semedo ke sînemaya seba 200  kesî bî 500 tutî amebî cakerdiş. Hedîse verê amebî plankerdiş û semedê ma hedîseya tewr bi dej a û serê tutanê ma de amebî caardiş.”

 

‘Baasî waşt hedîse binimino la ma eşkera kerd’

 

Peynîya qiseykerdişê xo de Zeynebe bale ant serê dewamkerdişê tekoşînê înan ê hemverê pêro tewirê şîdetî û çinkerdişî û wina vat: "Hemverê tewirê şîdetî, çinkerdiş û qirkerdişî her tekoşînê ma dewam o. Heta ke projeyê ma yê xoserîya demokratîke bi hawayekê fermî bêro tesdîqkerdiş do têkoşînê ma hemverê nê qetîlaman û bi taybetî qetlîamê sînamaya Amûdî ke semedê ma rojêke sîyaya dewam bikero. Pêwa qirkerdişê sîstemê baasî hewl da ke rastiyan binimino la ma bi têkoşînê xo rastîya sîyasetê înan ê lêşin verê pêro çimanê dinya de vist ra.”

 

‘Wazenê ma çinî bikerê’ 

 

Endama Meclîsê Taxa Cengîzî Mizgîn Reşîde zî amancê veşênayîşê Sînameyê Amûdê ercnaye û vat: “Sînemayê Amûdê de hetê rejîmê Baasî ra tutê ma ameyî veşênayîş. Semedo ke tutî bingehê komelî yê her tim wazenê înan çinî bikerê û şexsê înan de wazenê ma çinî bikerê û ma raştîya ma ra dûrî bifînê ke ma fek dewa û xebata xo ra biwerdê.”

 

‘Rêjimê Baasî nêeşkeno ma reyna çinî bikero’

 

Qiseykerdişê xo yê peyênan de Mîzgîne sîstemê baasî yê faşîst zî ercnaye û vat: “Siyasetê Baasî sey sîyasetê tewr lêşin û faşîst yê dewleta tirkan ke bi hêrişanê xo wazeno ma çinî bikero. Baas bi şerê xo yê taybet timî şarê kurdî tehdîd keno û şarê kurdî Sûrîye de heme heqanê înan dûrî bifîno. La ewro ma sey şarê kurdî hewne ra şîyar bîyî û êdî rejîmê Baasî nêeşkenê reyna ma çinî bikero û şorişê ke ma da destpêkerdiş do daîmî bibo.”