Oznur Deger

 

MÊRDÎN - Cinîyê mêrdînijî seba rayîr ra şîyayîşê 18ê Teşrîna Peyêne yê ver bi Gemlîkî ra veng kerdî û vatî ke seba ameyox û azadîye, seba tecrîd peynî bibo ganî her kes tewrê rayîr ra şîyayîşî bibo.

 

33 aşmî yo tu xeberêke Rayberê PKKyî Abdullah Ocalanî ra nîna girewtiş û muracatê keye û avûkatan bi bahaneyan yenê redkerdiş. Bi serkêşîya Têgêrayîşê Cinîyanê Azade (TJA) Komeleya Kesê ke Merdimê Xo Dergûşa Şaristanîye yê Mezopotamyaye de Vînî Kerdî (MEBYA-DER), Komeleya Hetkarî Bi Keye û Tepişteyan Reyde (TUHAY-DER) do 18ê Teşrîna Peyêne de bi waştişê wedaritişê tecrîdê serê Rayberê PKKyî Abdullah Ocalanî qezaya Gemlîkî ya Bursaye de "Rayîr ra şîyayîşê azadîye" pê bîyarê. 

 

Cinîyê mêrdînijî pêvînayîşê şarî yê aşma teşrîna peyêne yê babeta ‘tecrîdî’ de ameyî têkişt û bale antî serê tecrîd û hemwelatijan dawetê rayîra ra şîyayîşê 18ê Teşrîna Peyêne kerdî.

 

‘Ma veng danê her kesî ke tewrê rayîr ra şîyayîşî bibê’ 

 

Hemsereka DBPyî ya Mêrdînî Surreya Dundare dîyar kerd ke tecrîd tena serê Abdullah Ocalanî de nê heme şaran, tepişteyan û siyasetî de tesîr kerdo û wina vat: “Ma derheqê babeta tecrîdî de kombîyayîşê şarî pê ard. Ma venga şarê xo kenê ke tewrê Rayîr ra Şîyayîşê Gemlîkî yê 18ê Teşrîna Peyêne bibê. Ganî tewrbîyayîş xurt bibo. Ganî seba serekatîya xo ma raşteyan de rayîr ra şêrê û tecrîdî bişiknê. Ganî çi destê ma ra bêro ma bikerê. Tecrîd serê heme hetan de kerdo. Kurdan ser de polîtîkayê tecrîdî yê giran yenê rayîr ra berdiş. Coka ra ma veng bi şarê xo kenê ke tewrê Rayîr ra Şîyayîşê Gemlîkî bibê.”

 

‘Ganî her kes seba azadîya xo tewr bibo’ 

 

Verfeka TJAye ya Qoserî Jîyan Onere zî bale ant sere tesîrê tecrîdî yê şarî ser û wina vat: “Tewrbîyayîşê rayîr ra şîyayîşî xeylê muhîm o. Bi serran o malumat Abdullah Ocalanî ra nîno girewtiş. Ma weşîya ci û şertê ke tedeyo nêzanê. Coka ra ma heme şarê xo dawetê Rayîr ra Şîyayîşê Gemlîkî yê 18ê Teşrîna Peyêne kenê. Ganî her kes tewrê rayîra ra şîyayîşî bibo.”

 

Hemwelatija bi nameyê Hizna Kudaye zî da zanayîş ke ganî her kes seba azadîya Abdullah Ocalanî têkoşîn bikero û wina peynî kerd: “Serekatî seba 4 parçeyê Kurdistanî tepişte yo. Ma wazenê tecrîdê serê ci bişikîyo. Ma wazenê tecrîdê serê heme zîndanan bişikîyo. Ma paştîya înan de yê. Do 18ê Teşrîna Peyêne de rayîra ra şîyayîş pê bêro. Ma heme şarê xo dawetê rayîra ra şîyayîşî kenê.”