Oznur Deger

 

MÊRDÎN - Selamet Yeşîlmene 8 serrî yo Nisêbîn de wextê qedexeyan de verê keyeyê xo de hetê polîsan ra ameye qetilkerdiş. Kênaya aye Fîlîz Yeşîlmene wina vat: “Dewlete seba ke serê qewimîyayîşî bigêra vat ‘lajê Selamete molotof viraşto, destê ci de teqîyayo, bombe amade kerdo.’ La dewlete bi zanayîş ma kişte.” 

 

Qezaya Nisêbînî ya Mêrdînî de mabenê serranê 2015-2016î de qedexeyê raşteyan de xeylê binpaykerdişê heqan û sucê îşkenceyî ameyî kerdiş. Her çend ke 8 serrî derbaz bibo zî hema tesîrê qewimîyayîşî esto. Bi desan sivîlî hetê leşker û polîsan ra ameyî qetilkerdiş. Sewbîna kerdoxî zî nêameyî dîyîş û eksê ci ameyî pawitiş. 

 

Selamet Yeşîlmena 44 serrî 15ê Teşrîna Peyêne ya 2015î de qezaya Nisêbînî de verê keyeyê xo de ameye qetilkerdiş. Selamete 5 aşme digane bî. O wext gule ginabî lajê aye Fîkret û Sevcana ke aye wext 9 serrî bî zî û birîndar bîyî. Dermankerdişê Sevcane hema zî dewam keno.

 

 '8 serrî yo tu averşîyayîşêk çin o’ 

 

Her çend ke qewimîyayîş ra 8 serrî derbaz bibo zî kerdoxî nêameyî muhakemekerdiş. Avûkatê keyeyî muracatê Serdozgerîya Komare ya Nisêbînî kerd û dozger qerar da ke dosya raşteyê cezaya girane ya Mêrdînî de ya û dosya şirawit serdozgerîya komare ya Mêrdînî. Dosyaya ke merheleya tehqîqatî ra nêvejîya 8 serrî yo uca de yena vindarnayîş. 

 

Keyeyî bi hemkarîya avûkatê xo muracatê Mehkemaya Îdarî ya Mêrdînî kerd û seba ke dewa Wezîrîya Karê Zerre û Walîtîya Mêrdînî rê bêra akerdiş muracatê dozgerîye kerd. Kênaya Selamete, Fîlîz Yeşîlmene derheqê 8ine serrgêra qetilkerdişê dadîya xo de qisey kerd.

 

‘Kam bikewtêne verê înan gule reşênayêne’

 

Fîlîze da zanayîş ke o wext Nisêbîn de qirkerdiş ame kerdiş û her kes hedef ameyêne girewtiş û vat: “Devlet Bahçelî o wext vat wa kerra serê kerra de nêverdê. Dimayê ci merdimî ameyî qetilkerdiş. Dadîya mi seba ke yew bida bizinê xo çî cor. Dima ra ameye qetilkerdiş. No zî mird nêkeno way û birayê mi birîndar bîyî. Dewlete seba ke serê qewimîyayîşî bigêra vat ‘lajê Selamete molotof viraşto, destê ci de teqîyayo, bombe amade kerdo.’ La dewlete bi zanayîş ma kişte. Yewine waştişê ma no yo ke kiştoxî bêrê dîyîş û cezakerdiş.”

 

 ‘Dest mektebî ra verda’ 

 

Fîlîze dîyar kerd ke rojê zaf zehmetin cuyaya û wina dewam kerd: “Kes nêmend ke biewno way û birayanê mi ra. Coka ra mi fek mektebe ra verda. Sey her embazê xo ez do zî bişîyayêne unîversîte. La mecbur menda ke fek mektebî ra vera bida. Mi cuya xo da serê way û birayan û pîyê xo. Mi rojê zehmetan derbaz kerd. Heme bar serê milê mi de mend. Berpirsîyarîyê dadîya mi serê milê mi de mendî." 

 

 8 serrî yo edalet pê nîno 

 

Fîlîze ard ziwan ke çimêk waya aye ya birîndar protez kerdî û wina peynî kerd: “Waya mi 8 serrî yo baş nêbîya. Wexto ke qewimîyayîş pê ame hema 9 serre bî. Nika bîya 17 serrî. Waya mi bi şewe wiriştêne vatêne ez tersena. 8 serrî yo yena dermankerdiş. Parçeyê şarapnelî gina çimê aye. No 8 serrî yo edalet pê nêameyo. Yewine waştişê mi no yo ke dosya nêro nimitiş û kiştoxî bêrê cezakerdiş.”