Elfazî Toral

 

STENBOL - Sereka ÎHDyî ya Stenbolî Gulseren Yolerî dîyar kerd ke tecrîdê serê Reyberê PKKyî Abdullah Ocalan serê heme zîndanan de vila bîyo û bi raporê hîrê aşman ke eşkera kerdî nê çîyî reyna vetî raşte û vat: “Ganî tecrîd bêro çareserkerdiş, wedaritiş. Ma tecrîdo ke heme zîndanan de yeno rayîr ra berdiş yewna reye bîyarê rojeve.” 

 

Tecrîdê giran yê serê Rayberê PKKyî Abdullah Ocalanî ke 25 serrî yo zîndan de yo her ke şino giran beno û 33 aşmî yo ke tu xeberêke nîna girewtiş. Tecrîd zîndanê Kurdistan û Tirkîya de zî vila bîyo û roj bi roje rewşe giran bena. Dayeyê hîrê aşman yê Komeleya Heqê Merdiman (ÎHD) polîtîkayê tecrîdî û binpaykerdişê heqan reyna vet raşte. 

 

Sereka şûbeyê ÎHDyî ya Stenbolî Gulseren Yolerî derheqê raporo ke weşanayî û binpaykerdişê heqan yê zîndanan de ercnayîş kerd. 

 

Selahîyetdar waştişan pê nêanê! 

 

Gulserene dîyar kerd ke binpaykerdişê heqan yê zîndanan her ke şinê zêde benê û bi serran o netîceyê tespîtê kerdê zî tu netîce nêgirewtê. Gulserene wina vat: “Semedê problemê tepişteyan çareserîyêk nêame kerdiş. Çi heyf tu averşîyayîş çin o. Nê binpaykerdişî resayê nûqteyêk ke heqê cuye tehdîd keno. Ma dimayê ke tespîtê kenê hewl danê bala rayaumûmî û îstîmlakî biancê serê xo.”

 

‘Mergê bişikî zêde bîyî’

 

Gulserene dewam de wina vat: “Demê peyîn de mergê bişik zêde bîyî. Merdişê bişikî sebebê înan nîno tespîtkerdiş û sewbîna merdişê sey întîxar eşkera kenê estê. Merdişî sey întîxar nîşan danê zêde bîyî. Zext û tecrîdê serê tepişteyan întîxaran de bi tesîr o. Problemê psîklojîk zî zêde bîyê. Roja Heyetê Taqîbkerdişî û Îdarî ( ÎGK) dest bi xebate kerfo heta nika derbazê sîstemê puankerdiş û ercnayîşî yê ‘rewşa baş’. Bi nê puanan tepişteyî yenê ewnîyayîş. No puan benê sebebê veradayîşê bi konrol. Tepişteyî zîndanan de prosesêk wina ciwîyenê. Nê caardişê winasî hêvîya tepişteyan zî werte ra wedarnena.

 

Cuya tepişteyan bi binpaykerdişan vejêna werte 

 

Gulserene dewamê qiseykerdişê xo de dîyar kerd ke  muracatê semedê ÎHDyî ameyê kerdiş de 130 tepişteyî înfazê înan ameyo veşnayîş û vat: “Demo ke kesêk yeno tepiştiş ceza çiqas bo zî êdî nêzano key bêro veradayîş. Na rewşe tenê tepişteyê keyeyê înan zî tesîr keno. No hem keye, hem tepişteyan rê beno problemê psikolojik yê cidî. Raporê pey ma weşan kerdo de 83 muracatî ameyê kerdiş. Hûmara binpaykerdişan zî sey 2 hezar û 226 ame raporkerdiş. Çîyo ke tepişteyî ciwîyenê bi binpaykerdişan reyde vejîyenê werte.” 

 

Wa selahîyetdarî berpirsyarîyê xo bi ca bîyarê 

 

Gulserene ard ziwan ke raporê înan de binpaykerdişê heqan bi hawayêkê zelal yeno vînayîş û vat: “Rewşa uca wijdan, hîsê edeletî bi kurahî birîn keno. Caardişê zîndanan tenê înan eleqeder nêkeno. Sere de keyeyê înan û pêro komelî eleqeder keno. Ma xebatanê xo de bi taybetî paştdayîş û xurtkerdişî esas gênê. Ez reyke bîn venga selahîyetdaran kena ke berpirsyarîyê xo bi ca bîyarê.” 

 

Gulserene wina qedêna: “Yew beşo tewr girîn raporê tecrîdê Îmraliyî yo. 33 aşmî yo agahî Abdullah Ocalanî ra nîna girewtiş. Ganî tecrîd bêro çareserkerdiş, wedaritiş. Ma do tecrîdê pêro zîndanan de yeno rayîr ra berdiş, reyke bîn bîyarê rojeve. Ma do hemverê tecrîdî waştişê xo yê hetê huqûqî de bîyarê ziwan.”