Marta Somek

 

STENBOL- Hemsereka HDPyê Bakirkoyî Gonca Yangoze 2yê teşrîna verêne de bi 20 kesî reyde ameye destbendkerdiş û 4 roje ra dima serbest ameye verdayîş. Goncaye da zanayîş ke semedê qertê ke şirawitî cinîyan rê, tewrbîyayîşê eşkerayîyan û wendişê vilawekê seba çekê kîmyewîye ameyî sucdarkerdiş. Goncaye vat: “Ez partîye de xebetîyena. No seba mi suc nîyo. Ez do têkoşînê xo dewam bikera.” 

 

2yê teşrîna verêne de hemserekê HDPyî, aktîvîstê TJAye, Dadîyê Aştîye zî tede 20 kesî ameyî destbendkerdiş. 14 kesî dimayê îfadeyan serbest ameyî verdayîş û 4 kesî zî ameyî tepiştiş.

 

Hemsereka HDPyî ya Bakirkoyî Gonca Yangoze derheqê babete de qisey kerd. Goncaye dîyar kerd ke saetê serê sibayî de eştî keyeyê înan ser û netîceyê sereştişê keyeyî de ameya destbendkerdiş û vat: “Taxa ke ma tede cinîyenê de her kes xebatkarê HDPyî yo. Her kes yewbînan şinasneno. Amancê înan ê bi nê hêrişan no yo ke komel îzole bikerê. Bakirkoy de hemverê cinîyan de dişmenîyêk cinî esto. Eştî keyeyê 5 embazanê ma yê cinî ser de. Di embazê ma teber de bî, coka ra xo nêresnaybî înan. No hêriş bi amancê çimtersnayîşî yeno kerdiş." 

 

‘Bi ma sere nêdayî çewtkerdiş’ 

 

Goncaye ard ziwan ke 6 cinî nezaret de bî û nêardî kişta yewbînan û vat: “Ma bi veng vendayêne yewbînan. Nêverdayî ma bêrê kişta yewbînan. Bi nê caardişan waştî sere bi ma bidê çewtkerdiş. La ma sere nêtewêna. La bi hawayêkê kêfî nizdîyê ma bîyêne. Semedo ke ma tewrê eşkerayîyê tecrîdî bîyî, ma derheqê şuxilnayîşê çekê kîmyewîye de eşkerayî dayî û çalakî pê ardî ma ameyî sucdarkerdiş. Ez partîye de xebetîyena. No seba mo suc nîyo. Ez do têkoşînê xo dewam bikera.” 

 

Şirawitişê qertan suc o! 

 

Goncaye qiseykerdişê xo yê peyênan de vat: “Sewbîna sucdarkerdişê bîn şirawitişê qeratan ê seba tepişteyan bî. Ma 25ê Teşrîna Peyêne û 8ê Adare de qert nuşt. Ma resna embazanê xo. No zî suc ame hesibnayîş. Paştîdayîşê embazan zî suc ame dîyîş. Tewrbîyayîşê çalakîyan ê derheqê tecrîdî zî suc ameyî hesibnayîş. Ma do têkoşînê xo dewam bikerê.”