Rabîa Onver

 

COLEMÊRG - Derheqê hîrê kerdoxê destdergîyê Esra Y.ye de qerarê beratî ame dayîş. Waya Esraye Dilgaz G.ye dîyar kerd ke do seba heqê Esraye têkoşînê xo dewam bikerê. 

 

Dewa qezaya Şemzînanî ya Colemêrgî de 27ê Gulana 2016î de Veysî, Zahîr û Nîhat Yilmaz, tecawuzê Esra Y.ya 11 serrî kerdbî. Dima ke Esraye keyeyê xo rê qala qewimîyayîşî kerd prosesê huqûqî dîya destpêkerdiş û derheqê hîrê kesan de netîceyê dewaya ke Mehkemeya Cezaya Girane ya Geverî de ameybî akerdiş de bi sucdarîya ‘Hêrişê cînsî’ û ‘kesî/e azadîya aye ra bêparverdayîş’ ra her yew kerdoxî rê 42 serrî cezaya zîndanî ameybî dayîş. Bado ke kerdox Mehkemaya Edlî ya Herême de îtîraz kerdbî, qerarê xeripnayîşê cezaye ame dayîş û ame waştiş ke kerdox newe ra bêrê cezakerdiş. La dimayê 8 aşme tepiştişê kerdoxan bi îdîayê ‘delîl mird nêkenê’ kerdox ameyî tehlîyekerdiş. Bado ke kerdox ameyî tehlîyekerdiş Esraye rê întîhar ame ferzkerdiş. 

 

Bado ke kerdox serbest ameyî verdayîş keyeyê Esraye rê tehqîqat ame akerdiş. Waya Esraye, Dilgaz G.ye derheqê babete de ajansê ma rê qisey kerd. 

 

Esraye bi zorî ameye remnayîş 

 

Waya Esraye, Dilgaz G.ye dîyar kerd ke dadîya xo ra musaya ke destdergê bi Esraye ameyo kerdiş û dima ra şîya dewe û wina vat: “Roja ke Esraye dinyaya xo bedilna zî ez aye het de bîya. Esraye her çîyo ke sereyê aye ra derbaz bîbî mi rê vat û berma. Heta roja mergê xo hêsirê çimê aye nêvindertî. Nîhat Yilmazî sey birayê xo dîyêne. Esraye vat Nîhat aye xapênayo û veto teber. Dima ke veto teber wirdî kesê bînî ci het de bîyê. Esraye waşta ke birema zerre la fekê aye girewtî û remnayî."

 

 ‘Her tim tedaya psikolojîk bi Esraye kerdêne’ 

 

Dilgaze da zanayîş ke Nîhat, Zahîr û Veysî Yilmazî bi zorî Esraye remnayî û destdergê bi aye kerdî û nê çîyan ard ziwan: “Seba ke Esra vengê xo nêkera dîmenê aye antî û tehdîd kerdî. Esraye zaf kuyayî. Vatî qey merda û aye erzenê girê koyî. Mi bizanayêne Esraye xo kişena mi do timî xo ver de bigirewtêne. Dewijî timî tedaya psîkolojîk bi Esraye kerdêne. Esraye tute bî, nêeşkayêne vera înan de zêde xover bida.”

 

 ‘Dewijan teda bi keye kerd’ 

 

Dilgaze da zanayîş ke dewijan teda bi keyeyê aye kerd û wina dewam kerd: “Dewijan her tim teda bi keyeyê mi kerdêne ke Esraye dewe ra bêra vetiş. Dewijan vatêne tay kesê bînî destdergê bi Esraye kerdî. La mesajê ke Nîhat şirawitî Esraye rê raşte de yê. Esraye mi rê vat ‘vîşêrê nê hîrê kesan yewna kesêk çîyêk bi mi nêkerdo’. Dimayê nê vatişî şîye ode û 5-10 deqe ra dima veng ame. Ma şîyî ode ke Esraye mîyanê gonî de menda. Dimayê Esraye dadîya mi çend şî xirab bî. 4 roje hedîse ra ver pîlê dewe ameyî keyeyê ma û bi Esraye ra ode de qisey kerdî. Di saetan ra dima ode ra vejîyayî. Sereyê Esraye şikitbî. Aye kuyabî. Ma vat şima qey wina kerd, zerre ra vejîyayî. Esraye aye roje ra dima qisey nêkerd.”

 

 ‘Kesêk vengê ma nêeşnawit’ 

 

Dilgaze dîyar kerd ke dima ke Esra dinyaya xo bedilnaye dewijan timî aye tehdîd kerdo û teda bi aye kerdî û wina vat: “Welat de edalet çin o. Seba ke tecawuzkarî 8 aşme zerre de mendî 300 hezar pere ma ra waştî. Mehkema tedaya serê ma zanayîne la veng nêkerd. Roja ke dosya newe ra ame rojeve her kes zanayêne sucdar kam o. Vera hende delîlê somutî serbest ameyî verdayîş. Sucdar keyeyanê xo de asan manenê.”

 

 ‘Ma do wayîrê heqê Esraye bivejê’ 

 

Dilgaze qiseykerdişê xo yê peyênan de vat ke do her tim wayîrê heqê Esraye biveja û peynî kerd: “Roniştişê peynî de tecawuzkar nêameyî mehkema. Înan 15 roje verê roniştişî zanayêne ke do berat bikerê. Coka ra zî zaf rehet bî. Dimayê beratî sey pîrozkerdişî heta verê keyeyê ma gule reşênayî. Vera nê heme çîyan ma do wayîrê heqê Esraye bivejê. Eke lazim bikero ma do dosya berê her ca.”