Rozerîn Gultekîn

 

AMED - Endama Têgêrayîşê Ekolojîye ya Mezopotamyaye Derya Akyola ke 172 dezgehê ke îmza eştî deklerasyonê ‘Nika ra ver bi ameyoxî vengdayîşê aştîye’ yew a, wina vat: “Ma prosesê ke krîzê zaf hetin yenê ciwîyayîş ra derbaz benê. Seba paradîgma biba qanûn û Birêz Abdullah Ocalan azad bibo, çareserîya probleman ma zî îmze eşt deklerasyon.” 

 

Tecrîdo giran yê serê Rayberê PKKyî Abdullah Ocalanî no 25 serrî yo dewam keno. Seba wedaritişê tecrîdî û pê ardişê azadîya fîzîkî 28ê Teşrîna Verêne de Stenbol de mîyanê ci de rojnameger, sîyasetmedar, roşnvîr û hunermendî 78 kesan bi sloganê 'Vengdayîşê aştîye' deklerasyonêk eşkera kerd. Amed de zî 29ê Teşrîna Verêne de 172 dezgehan Sûrê Amedî de bi sernameyê "Nika ra ver bi ameyoxî vengdayîşê aştîye" deklarasyon eşkera kerd û nizdîbîyayîşê xo deklere kerdî. Endama Têgêrayîşê Ekolojîye ya Mezopotamyaye Derya Akyola ke 172 dezgehê ke îmze eştî deklerasyonî ra yew a derheqê deklerasyon û amacê deklerasyonî de qisey kerd.

 

‘Deklerasyon çareserîye nîşan dano’ 

 

Derya da zanayîş ke amacê cagirewtişê înan ê deklerasyona ke 172 dezgehî îmze eştbî ci, çareserîya krîz û çareserîya problemê Tirkîya û Kurdistanî ya û vat: “Deklerasyon nuqtaya çareserîya nê probleman nîşan dana. Tecrîdêk giran serê komelî de esto. Şerêk milîtarîzmî dinya de esto. Tecrîd tena babeta Kurdistanî nîyo. Tirkîya de zî vernîya caardişê vera demokratîke akeno. Abdullah Ocalan dîyar kerdbî ke do seserra 21ine de biba wextê şerî. Vera nê çîyan de lazimîya şarî bi aştîye esta.”

 

 

 ‘Vera netew dewletan konfederalîzmê demokratîke’ 

 

Derya dewamê qiseykerdişê xo de da zanayîş ke şerê ke yenê ciwîyayîş tewr zêde şarî ser de tesîr virazenê û vera nê de seba çareserîya şarî, seba azdîya Abdullah Ocalanî kampanyayan pê anê. Derya wina vat: “Na kampanya seba paradîgmaya ke Abdullah Ocalan ronayo raşte bikewo cuye yena kerdiş. Lazimîya bi paradîgmaye yena dîyîş. Vera modernîteya kapîtalîst, konfederalîzmê demokratîke yeno pêşkêşkerdiş. Vera netew dewlete modernîteya demokratîke yeno pêşkêşkerdiş. Ma prosesê krîzêk zaf hetin ra derbaz benê. Seba paradîgma bikewo cuye û Birêz Abdullah Ocalan azad bibo, ma zî îmze eşt nê deklerasyonî.” 

 

‘Lazimîya komelî bi aştîye esta’ 

 

Deryaye qiseykerdişê xo yê peyênan de bale ant serê lazimîya aştîye û wina peynî kerd: “Bi serran o ma pê na paradîgmaye têkoşîn kenê. Heta ke tecrîdo giran nêwirzo ma do têkoşîn bikerê. Lazimîya xozaye û komelî bi aştîye esta. Na babete tena babeta kurdan nîya, heme dinya eleqedar kena. Ma do semedê cuya ke ma bieşkê tede biciwîyê, têkoşîn bikerê.”