Melike AydÎn

 

HATAY - Dewa Dîkmece ya Hatayî rê qerarê îstîmlaqkerdişê lezkî ameybî dayîş. Hemwelatijê dewe dîyar kerdî ke qerarê vindarnayîşî ameyo dayîş. Meryem Mutluye da zanayîş ke eke vera qeraro ke ameyo dayîş xebat dewam bikerê do heyetêk awan bikerê, bi selahîyetdaran reyde pêvînayîş pê bîyarê û vat: “Tena Dîkmece nê dewê bînî zî binê rîskî de yê. Ma paweyê paştîdayîşî yê.” 

 

Serê di erdlerzê ke merkezê înan Mereş bî ra 9 aşme derbaz bî. Bajarê ke tede rijnayîş pê ame de cuye her ke şina zehmetin bena. Nê bajaran ra yew zî Hatay bî. Hetê Serekatîya Îdareya Awanîyê Komî (TOKÎ) ra seba viraştişê awanîyan bi lezkî qerarê îstîmlaqkerdişî ameybî vetiş û makînayê karî kewtbî erdê dewijanê dewa Dîkmece û dest bi xebatan kerdbî. 3ine mehkemaya Îdarî ya Hatayî 7ê teşrîna peyêne de qerarê vindarnayîşê qerarî da. 

 

Dewijê dewa Dîkmece ra Meryem Kutluye derheqê qerarî de ajansê ma rê qisey kerd.

 

‘Xoverdayîşê ma dewam keno’ 

 

Meryeme dîyar kerd ke qerarê mehkema moral dayo înan û vat: “Ma îradeyêk xurt rona raşte. Coka ra no qerar ame dayîş. Eke ma sere çewt bikerdêne, nika rewna ma dar û erdê xo vînî kerdbî. Do xoverdayîş dewam bikero. Ma hema ser nêkewtî. No tena gamêk o. No qerar moral da ma heme kesan.”

 

‘Înşaet hema nêvinderto’ 

 

Meryeme da zanayîş ke xebatê înşaetî hema nêresayî darê zeytunan û wina dewam kerd: “La xebatkarê şîrketî ma tehdîd kenê. Vanê dimayê wextê hesadê zeytunan darê xo bibirnê yan zî ma do koke ra bivejnê. Hema raşte de awanî çin a. La wexto ke ma şinê xebate dewam kena. Cendirmeyan barîkat awan kerdî. Wexto ke ma şîyî serê erdê xo ma ra tersayî. Ma do nêrê provakasyonan. Ma do hîna xurt têkoşîn bikerê.”

 

‘Ma do bi heyete şêrê’ 

 

Meryeme ard ziwan ke cendirmeyan barîkat awan kerd la ganî şîrket nê hemwelatijan bipawê û wina vat: “Ma vat şima nika suc kenê, ganî no bêro vindarnayîş. La huqûq nas nêkenê. Qerar newe ame dayîş. Ma do çend rojan vinderê. Eke xebatî dewam bikerê ma do bi heyetêk şêrê. Ma şîdet nêwazenê. Ma wazenê ke bi huqûqî her çî hal bibo. Ma toma û cendirmeyan nêwazenê. Ez seba Dîkmece venga hîsgêrîye kena. Dewê Vakifli û Kirikhanî de zî eynî proje rojeve de yo. Ez venga hemwelatijanê armenîyan yê nê dewan kena ke ma pîya têkoşîn bikerê.”

 

‘Koçberîye ma rê yeno ferzkerdiş’ 

 

Meryeme qiseykerdişê xo yê peyênan de nê ercnayîşan kerd: “Ma do wayîrê herra xo bivejê. 7ê teşrîna peyêne de Heyetê Pêroyî yê Meclîsî bi îmzeya parlamenterê AKPyî, ‘Pêşnûmeyê Derheqê Bedilnayîşê Tay Qanûnan de yê Derheqê Bedilnayîşê Raşteyê Binê Bobelatî de’ ame qebûlkerdiş. No qanûnê dişmenîye yo. Ma keyeyê xo ra nêvejîyenê. Hewl danê ma tîya ra koçber bikerê. Tu ferqê ma Gazze ra çin o. Ma sey şarê elewî do wayîrê mal û erdê xo bivejê. Ma her kesî ra paştîdayîş pawenê.”