Habîbe Eren

 

MEREŞ - Qezayê ke erdlerzî de tesîr bîyî ra yew zî Nurhaq bî û Nurhaq de pesdewarî û citkarî ameyî merheleya çinîbîyayîşî. Arzu Gula 35 serrî ke bi pesdewarî reyde meşgul bena dîyar kerd ke dimayê erdlerzî hukmato îqtîdar mazot û zibil nêdayo heywankaran û coka ra xeylê heywananê xo rotî û eke wina dewam bikero do pesdewarî ra fek vera bidê. 

 

6ê Sibate de merkezê ci Mereş de di erdlerzê girdî qewimîyayî û yew cayo ke tewr zêde tesîr bî zî Nurhaq bî. Goreyê dayeyanê fermî 87 kes Nurhaq de dinyaya xo bedilna û xeylê awanî û axurê qezaye rijîyayî. Qezaye nameyê xo Koyê Nurhaqî ra herînena û bakurê qezaye de Elbîstan, başûrê ci de Çaglayancerît, rojawanê ci de Ekînozu, rojhelatê ci de zî qezayê Golbaşi ya Semsurî û Doganşehîrî ya Meletî ca gênê. Çimeyê tewr gird ê qezaye pesdewarî ya. Dimayê erdlerzî pesdewarî ameye merheleya çinîbîyayîşî. 

 

Azra Gule ke taxa Karaçarî de çewlîkê aye esta û bi karê pesdewarî reyde meşgul bena, dîyar kerd ke dimayê erdlerzî pesdewarî û citkarî ameyî merheleya çinîbîyayîşî.

 

‘Ma heywanan pê awa vewre miqate kerd’ 

 

Arzuye dîyar kerd ke erdlerz wextê zabîyayîşê heywanan de pê ame û nê çîyan vat: “Wextê zabîyayîşê heywanan bî. Cereyan çinî bî. Awe çinî bî. Çîyo ke ma dî nîno vatiş. Ma heywanan pê awa vewre weye kerd. Yew hewteyê ma wina derbaz bî. Dima ra cereyan ame. La reyna ame birnayîş. Ma tersayî ke heywanê ma bimirê. Ma îtfaîye û şaredarîye ra hetkarî waşt. 35 serrî yo ma pesdewarî reyde meşgul benê. Sey tutê mi bî. Ez senî heywanê ke mi înan miqate kerd, biwera. Mi înan pîl kerd, weye kerd. Wexto ke erdlerz yeno mi vîr ez xo xirab hîs kena.”

 

‘Zaf tenan heywananê xo rot’ 

 

Arzuye nê çîyan ard ziwan: “Dimayê erdlerzî hukmat hetkarîya mazot û zibilî nêda. Ma bi îmkananê xo her çîyî kerd. Taxa bîn ya ke şima şinê de zî rewşe wina ya. Ê zî îdareyê xo bi şitî kenê. Ê zî perîşan bîyî. Heywanê xo rotî. Tay kesan zaf erzan rot. Nika 100 dewarê ma estê. La dimayê erdlerzî ma zafane rot. Nê rojan de ma 10 heban serebirna. Paştîdayîş çinî yo. Citkarî qedîya yo. Ez tutanê xo dana wendiş. Ez îdareyê keyeyê xo kena. Ez nêweş a, la reyna zî xebetîyena. Mecbura ke bixebeta.”

 

‘Heta 12ê şewê xebetîyena’ 

 

Arzuye da zanayîş ke serê sibayî lez wirzena û vat: “Senî wirzena êm dana heywanan û înan doşena. Dima ra dest bi viraştişê penîrî kena. Ez bi baxçe reyde meşgul bena. Dima ra reyna şina verê heywanan. Ez heta 12ê şewe xebetîyena. Mesrefê heywanan zaf zêde yo. Wina dewam bikero ma do fek pesdewarî ra vera bidê. Qet paştîdayîş nîno dayîş. Pesdewarî ameyo merheleya çinîbîyayîşî. Dimayê erdlerzî ma bi cinîyan reyde kewtî paştîdayîşê kolektîf. Ma her roje kom benê û ka rê xo kenê. Ma bi paştîdayîşî payan ser de yê.”

 

 

‘Pesdewarî ameyo merheleya çinîbîyayîşî’

 

Arzuye qiseykerdişê xo yê peyênan de dîyar kerd ke pesdewarî ameyo merheleya çinîbîyayîşî û vat ke yewine çimeyê îdareyê înan pesdewarî yo û vat: “Rewşa ke ma bacê xo danê de cezayê giran yenê dayîş. Dimayê erdlerzî koçberîyêk gird ame ciwîyayîş. Banê merdiman rijîyayî la tu hetkarî nêame dayîş. Hukmat bi kewçikê çape dano û bi kepçeyî herîneno.”