Zelal Tunç

 

WAN - Cinîyê Wan û qezayanê ci tewrê pêvînayîşê şarî bîyî û dîyar kerdî ke ganî pêvînayîşê bi Rayberê PKKyî Abdullah Ocalanî reyde lezkî pê bêro û seba rayîr ra şîyayîşê 18ê teşrîna peyêne ya Gemlîkî zî venga tewrbîyayîş kerd. 

 

33 aşmî yo tu xeberêke Rayberê PKKyî Abdullah Ocalanî ra nîna girewtiş û muracatê keyeyan û avûkatan bi bahaneyan yenê redkerdiş. Bi serkêşîya Têgêrayîşê Cinîya Azade (TJA) Komeleya Paştîdayîşê Keyeyê Tepişteyê Dergûşê Şaristanîyan de (MEBYA-DER), Komeleya Hetkarîya Keye û Tepişteyan (TUHAY-DER) do 18ê teşrîna peyêne de bi waştişê wedaritişê tecrîdê serê Rayberê PKKyî Abdullah Ocalanî qezaya Gemlîkî ya Bursaye de ‘rayîr ra şîyayîşê azadîye’ pê bêro. Çarçeweya nê rayîr ra şîyayîşî de bajaran de pêvînayîşê şarî dewam kenê. Wan û qezayê ci Erdîş, Ebex, Elbaq û Şaxê de pêvînayîşê şarî dewam kenê. 

 

Cinîyan derheqê tecrîd û binpaykerdişê heqan yê zîndanan de ajansê ma rê qisey kerdî. 

 

 

Merdima tepişteyî Maksude Atamane da zanayîş ke 7 serrî verê cû qezaya Erdîşî de hedîseya ke veyva aye Hedîye Atamane ameye veşênayîş û qetilkerdiş de lajê aye Ahmet Ataman ame tepiştiş û vat: “Lajê mi Ahmet o ke Mûş de tepişte bî, surgunê zîndanê Tîpê Lyî yê Panosî ame kerdiş. Ez waştişê edaletî kena. Wa peynîya polîtîkayê tecrîdî bîyarê.” 

 

‘Wa Abdullah Ocalan serbest bêro verdayîş’

 

Derya Taştana ke aye zî tewrê pêvînayîşê şarî bîbî wina vat: “Ma wazenê tutê ma serbest bêrê verdayîş. Ma serekatîyê xo meraq kenê. Caardişê tecrîdî sey zilmî yo. No zilm bi yewîya şarê kurdî eşkeno biqedîyo. Ma do ser bikewê.” 

 

‘Herra Rojawanî yê şarê tîya yo’ 

 

Hanim Varliye ard ziwan ke ganî şerê dinya yê ke nika dewam kenê peynî bibê û wina vat: “Ma nê polîtîkayê înkar û îmhayî qebul nêkenê. Şarê Rojawanî bi îmkananê xo xover da. Ewro bi serkewtişêk gird cuye newera awan kerdî. Tu heqê yew kesî çin o ke hêrişê uca bikero. Kesê ke vanê ma misliman ê şer kenê. Herra Rojawanî yê şarê tîya ya. Rayberê her şarêk esto. Yê şarê kurdî zî Abdullah Ocalan o. Wa tecrîdê serê ci peynî bibo. Wa şarê kurdî bibo yew.”

 

‘Ma polîtîkaya tecrîdî qebûl nêkenê’ 

 

Zulfînas Ataçe zî dîyar kerd ke ganî binpaykerdişê zîndanan û polîtîkayê tecrîdî peynî bibê û vat: “Ganî tecrîdê serê Abdullah Ocalanî peynî bibo. Ganî şar reaksîyon bimojno tecrîdî ro. Ganî şar pîya vera tecrîdî de têkoşîn bikero.”

 

‘Şarê Kurd qey bêveng o?’ 

 

Behîce Çakira ke aye zî tewrê pêvînayîşê şarî bîbî vat: “Tecrîd wirzo do şer zî peynî bibo. Serra 2015î de prosesê aştîye de demêk weş ame ciwîyayîş. Tecrîd suc o. xeylê siyasetmedarî zîndanan de yenê tepiştiş. Vera tecrîdî de ganî şarê kurdî bibo yew û vera nê zilmî de têkoşîn bikero. Ma şer qebûl nêkenê.” 

 

Cinîyan ra tewr peynî Hanim Yildize qisey kerd û da zanayîş ke Abdullah Ocalan seba gerîla, seba zilmê serê şarî uca de yo û wina peynî kerd: “Ma paştîya şehîdanê xo, paştîya serekatîyê xo de yê. Dewlete ma bikişa zî ma fek dewaya xo ra vera nêdanê. No tecrîd wirzo do şer zî biqedîyo.”