Habîbe Eren

 

MEREŞ - Melek Çalişa se ra 60 astengdar a û konteynirê dewa Çîglî ya qezaya Dulkadîroglu ya Mereşî de ciwîyena, qala zor û zehmetîyê cuya konteyniran kerd û vat: “Bi aşman o ez na rewşe de ya. Wexto ke karê merdiman virazîyeno teber de ez bi tena sereyê xo nêeşkena biveja teber. Seba mi cuye hîna zehmetin a.” 

 

Serê Erdlerzê Mereşî ra 8 aşmî derbaz bî û hema zî qeza û dewan de problemî yenê ciwîyayîş. Hemwelatijê serê 65 serrî, tutî, kal û pîrî, cinî, kesê nêweşîyê înan yê kronîk estê hîna zêde zehmetîyan ancenê. Sozo ke ‘do 6 aşman de awanîyê şima bêrê viraştiş’ nêame ca. Konteynirê ke ameyî awankerdiş de şertê cuye goreyê astengdaran nêameyî viraştiş û lazimîyê sey starbîyayîş, derman, cilî, banyo, tuwalet û sewbîna çîyî zî nînê çareserkerdiş. Na rewşe cuya mexduranê erdlerzî yê astengdaran di qat hîna zêhmet kena. 

 

Melek Çalişa se ra 60 astengdar a û konteynirê dewa Çîglî ya qezaya Dulkadîroglu ya Mereşî de ciwîyena, qala zor û zehmetîyê cuya konteyniran kerd.

 

‘Seba her kesî zehmet o la seba mi hîna zehmet o’ 

 

Meleke da zanayîş ke wexto ke erdlerz qewimîya qatê çarine yê awanîye de bîya û dimayê erdlerzî di aşman Stenbol de mendê. Meleke wina vat: “Wexto ke Stenbol de bîya tena yew reye ez vejîyaya teber. Vera heme zehmetîyan mi waşt ke ez bêra wareyê xo. Ma yewê nîsane de ameyî konteynir. Xêrwaştoxêk teberê welatî ra hetkarîya ma kerd. Her kes şertê zehmetinan de maneno. Banyo, lavabo yew o. Her kes nê hewşî de yo. Seba her kesî cuye zehmetin a la seba mi hîna zehmet a.”

 

 ‘Bi aşman nê hewşî de menda’ 

 

Meleke dewamê qiseykerdişê xo de dîyar kerd ke hetê şuxilnayîşê lavaboye de zehmetîyan ancena û wina vat: “Ez bi zorî sereyê xo şuyena. Bi zorî kincanê xo xora dana. Ez ge-ge aciz bena la tena nêeşkena biveja teber. Îmkanê mi çin o. Dadîya mi erebokê bi aku ana. Aşma nîsane ra nata tena di reyan ez seba şîyayîşê AFADî vejîyaya teber. Ez şîya AFADî, erebok ra zî nêameya war. Bi aşman nê hewşî de menda.” 

 

Meleke qiseykerdişê xo yê peyênan de zî nê ercnayîşan kerd: “Konteynir ra vejîyayîş zehmetin o. Ez tena sereyê xo nêeşkena biveja teber. Es seba her kesê ke paştîdayîş dayî ma sipasîyan kena. Xeylê kesan hetkarîya ma kerd. Teberê welatî ra hetkarîya ma kerdî. Venga mi esta ke seba astengdarê ke konteyniran de manenê şertê cuye bêrê başkerdiş.”