Yeşîm Oruç

 

MERKEZÊ XEBERAN - Goreyê çeteleyê Şîdetî yê aşma Teşrîna Verêne yê Ajansê ma 28 cinî ameyî qetilkerdiş, 13 cinî û 3 tutî bi hawayêkê şikin dinyaya xo bedilnayî. 

 

Vera dayeyê şîdetî yê ke Kurdistan û Tirkîya de serê çapemenîye de yenê weşanayîş, beşêk zaf tay ê tabloyê şîdetî yê ke zêde bena mojneno, beşê bîn ke nêameyo weşanayîş ra hîna zêde yo. Rêxistinê cinîyan zêdebîyayîşê şîdetî bi qiseykerdişê camêrdan yê îqtîdarî ra girêdaye vînenê, qewimîyayîşê ke qewimîyenê zî nê tespîtî tesdîq kenê. Polîtîkayê bêcezaverdayîşî û kêmkerdişê cezayê ke hetê muhakemeyî ra dimayê şîdetî yenê dayîş, rayîrê camêrdan akenê ke qetlîyaman pê bîyarê.

 

Raşteyê erdlerzî de vengê cinîyan nîno eşnawitiş

 

Cinî kam ca de hetgirîyê xo zêde kerdî, bîyî hedefê hukmatî û camêrdan. Bi taybetî aşma Adare de herêma erdlerzî de şîdetê camêrdî zêde bî. Nêbîyayîşê mekanîzmayê vernîgirewtişê şîdetî vera cinî nêeşkenê vengê xo vera şîdeto ke bi înan yeno kerdiş bidê eşnawitiş. Nêbîyayîşê cigêrayîşê serê tutan ra zî tewr zêde tutan rê şîdet yeno kerdiş. 

 

Goreyê bîlançoya şîdetî yê aşma Teşrîna Verêne çarçeweya dayeyê ke ajansê ma pêser kerd de 28 cinî ameyî qetilkerdiş, 13 cinî û 3 tutî zî bi hawayêkê şikin dinyaya xo bedilnayî. Heto bîn de cehd ame kerdiş ke 2 cinî zî bêrê qetilkerdiş. 

 

Kerdox keso tewr nizdî yo 

 

12 cinî hetê camêrdo ke bi înan reyde ameyî zewecnayîş, 2 cinî hetê camêrdê ke nêşinasnenê, 2 cinî hetê lajê xo ra, 2 cinî hetê birayê xo ra, 2 cinî hetê cîranê xo, 2 hetê camêrdo ke bi înan reyde prosesê fekverdayîşî de bî, 1 cinî hetê camêrdo ke fek ci ra vera dabî, 2 cinî hetê embazê ke înan redye ciwîyayî, 2 cinî hetê embazê ke înan ra cîya bîyî û cinîyêk zî hetê pîyê xo ra ameye qetilkerdiş.

 

Tewr zêde cinî Edene û Anqara de ameyî qetilkerdiş 

 

Mêrdîn de 2, Artvîn de 2, Anqare de 3, Mersîn de 2, Edene de 3, Stenbol de 1, Riha de 1, Îzmîr de 1, Eskîşehîr de 1, Dîlok de 1, Isparta de 1, Antalya de yew, Tekîrdag de 1, Konya de 1, Trabzon de 1, Agirî de 1, Edîrne de 1, Bayburt de 1, Sakarya de 1 û Bursa de zî cinîyêk ameya qetilkerdiş.