Rabîa Onver

 

COLEMÊRG - Derheqê qewimîyayîşê tecawuzî yê Esra Y.ye de qerarê beratî ame dayîş la keyeyê aye bi îdîayê ‘kiştişê bi qestî’ rê tehqîqat ame akerdiş. 

 

Dewa qezaya Şemzînanî ya Colemêrgî de 27ê Gulana 2016î de Veysî, Zahîr û Nîhat Yilmaz, tecawuzê Esra Y.ya 11 serrî kerdbî. Dima ke Esraye keyeyê xo rê qala qewimîyayîşî kerd prosesê huqûqî dîya destpêkerdiş û derheqê hîrê kesan de netîceyê dewaya ke Mehkemeya Cezaya Girane ya Geverî de ameybî akerdiş de bi sucdarîya ‘Hêrişê cînsî’ û ‘kesî/e azadîya aye ra bêparverdayîş’ ra her yew kerdoxî rê 42 serrî cezaya zîndanî ameybî dayîş. Bado ke kerdox Mehkemaya Edlî ya Herême de îtîraz kerdbî, qerarê xeripnayîşê cezaye ame dayîş û ame waştiş ke kerdox newe ra bêrê cezakerdiş. La dimayê 8 aşme tepiştişê kerdoxan bi îdîayê ‘delîl mird nêkenê’ kerdox ameyî tehlîyekerdiş. Bado ke kerdox ameyî tehlîyekerdiş Esraye rê întîhar ame ferzkerdiş. 

 

Roniştiş ra ver tehdît keno 

 

Roniştişê dewaye ra ver Mehkemaya Cezaya Girane ya Geverî de 3yî teşrîna peyêne de keyeyê Esraye hetê kerdox û keyeyê înan ra raştê tehdîtanê kiştişî yenê. Goreyê malumatê ke hetê keyeyî ra ameyî dayîş, ame dîyarkerdiş ke eke roniştiş de kesêk bêro tepiştiş do birayê Esra Y.ye Omer Y.yî bêro qetilkerdiş û keyeyê înan yê dewe bêro vengkerdiş. 

 

Omer Y. roniştiş ra ame vetiş 

 

Roniştişo ke kerdox nêşîyî de Omer tedaya de dewe û çîyê ke Esraye întîharî ra ver ci reyde derbaz kerda, vat û kesê ke paştî dayî rê zî sipas kerd. Heyetê mehkema reaksîyon mojna Omerî û vat: “Tîya cayê sipasîyan nîyo.” Avûkatê ke nêwaştî Omer salona roniştişî ra bêro vetiş zî semedo ke îtîrazê înan nêame qebulkerdiş vatî ke ê do tewrê roniştişî nêbê. 

 

Heto bîn de zaf balkêşo ke Hetkarê Walîyê Colemêrgî zî tewrê roniştiş bî. Dimayê mabene, dekewtişê avûkatan ê salonî ra ver mehkema, heyetê mehkema bi bahaneyê ‘delîl mird nêkenê’ qerarê beraetî da 3 kerdoxan rê. 

 

Keye rê tehqîqat ame akerdiş 

 

Roniştiş de ame vatiş ke netîceyê tesilî yê ke Esraye bena hetê kesêk bîna ra ameya kiştiş estê û derheqê keyeyî de bi sucê ‘kiştişê bi qestî’ ra tehqîqat ame destpêkerdiş. Heto bîn de ame îdîakerdiş ke bi ercnayîşê babetê bînî yê ke dosya de yê DNA bi temamî nêameyo tespîtkerdiş. Qerar ame dayîş ke derheqê kam tecawuzê Esraye kerdo de tehqîqatêk newe bidîyo destpêkerdiş.