ÎZMÎR - Wezaretê Xizmetê Keye û Komelî 81 bajaran de ‘komxebata keyeyî’ pê ard. Komeleya Paştîdayîşê Cinîyan a Îzmîrî ra Badegul Gulere derheqê babete de qisey kerd û vat ke do waştişê cinîyan bîyarê ziwan û têkoşîn dewam bikerê. 

 

Wezaretê Xizmetê Keye û Komelî pêşnumeyêk ke derheqê ‘komxebata keyeyî’ ra pê yeno û semedê 81 bajaran do pê bêro, şirawit Mudirîyetê girêdayeyê wezîrîye. Amacê komxebatan pawitişê keye, xurtkerdişê keye û zêdekerdişê asayîşê komelî yo. Zaf eşkerayo ke bi nê komxebatan yeno amanckerdiş ke heqê cinîyan destê înan ra bêrê girewtiş, prosesê derheqê cinîyan bêrê zehmetkerdiş. Merkezê Cigêrayîş û Huqûqî yê Heqanê Merdiman ê Cinîyan ê Baroyê Îzmîrî sey alternatîf 20ê teşrîna verêne de atoleyayê ‘têduştîya cînsîyet, şîdet, fekverdayîş, nefeqe, velayet û kede’ pê ard. Merkezî dima ra zî raporê xebatê xo eşkera kerd. Ame vatiş ke do rapor bişirawê wezaretî. 

 

Rayîrberîya Komeleya Paştîdayîşê Cinîyan a Îzmîrî ra Badegul Gulere derheqê babete de ercnayîş kerd û vat rewşa ke îqtîdar dest nêdo qanûnan û qanûnan pê bîyaro do gamêk seba vernîgirewtişê şîdetî bêro eştiş.

 

‘Dimayê Peymana Stenbolî nika zî qanûnê 6284î’

 

Badegul Gulere dîyar kerd ke qasê zewacî fekverdayîş zî prosesêk xozayî yo û vat ke na cografyaye de bawerîyêke seke heta peynî ganî zewecnaye bimanê esta. Badegule wina dewam kerd: “Na rewşe xo erzena nêtêduştîya cînsîyetî. Dimayê demêk bi cinîyan zewac yeno ferzkerdiş, welidnayîş yeno ferzkerdiş. La her tim bê zerrîya xo mecburî yenê zewecnayîş. Zewac, hûmara tutan, cuya goreyê înan yeno ferzkerdiş. Coka ra zî Peymana Stenbolî ame wedaritiş. Nika zî wazenê qanûnê 6284î raşte ra wedarnê. Wazenê nefeqe raşte ra wedarnê.” 

 

‘Destkewtişan çinî kenê’ 

 

Badegule dîyar kerd ke bi têkoşînê cinîyan destkewtiş ameyî destfînayîş û wina vat: “Serra 2002yî ra heta nika parekerdişê malê keyeyî babeta vatişî bî. Çekuya reîsê keye ame wedaritiş. Tay heq ameyî destfînayîş. La nika ma reyna agêrenî sere. Wazenê înan heqan destê cinîyan ra bigîrê. Wazenê cinîyan siyaset, raşteyê xebat, komel û sendîkayan ra dûrî bikerê.” 

 

Waştişê cinîyan 

 

Badegule qiseykerdişê xo yê peyênan de vat: “Vera înan nêtêduştî de ganî tedbîr bêrê girewtiş. Înan ra yew zî feqîrîya cinî û xoresnayîşê edaletî yo. Seba çareserkerdişê feqîrîya cinîye ganî îstîhdam bêro awankerdiş. Ganî kreşê tutan bêrê akerdiş. Ganî merkezê astengdaran bêrê akerdiş. Ganî dezgehê ke karê cinîyan asan kenê bêrê akerdiş. Ganî îqtîdar fek vatişanê xo yê derheqê zewacî ra biverdo. Wexto ke şertê ekonomîye verê çiman de bêrê girewtiş her kes mecbur nîyo ke bizewecîyo. Nika reyna kredî vetî semedê kesê ke emrê înan mabenê 18-27î de yo. Dewlete emrê zewacê ma tîya de ano ziwan. Reyna bi serran vatî hîrê tutî. Ganî dewlete fek nê vatişan de biverda. Wa qanûnan pê bîyara û vernîya şîdetê camêrdî yê vera cinîyan bigêra. Bi no hawa gamêke do bêro eştiş. Ma do vera nê caardişan de têkoşînê xo dewam bikerê.”